Саяхан Мексик улсын дөрөв дэх том хот болох Темиско хотын захирагчаар сонгогдсон Хисела Мота амь үрэгджээ. Түүнийг албан үүргээ хүлээн аваад нэг ч хоноогүй байхад зэвсэгт этгээдүүд гэрт нь нэвтэрч, хөнөөсөн байна.

Хотын эрх баригчдын мэдээлснээр энэ хэрэгт есөн этгээд оролцжээ. Эдгээр сэжигтэн хэргийн газраас зугтахаар оролдож, улмаар цагдаа нар тэдний автомашиныг мөшгин хөөх явцдаа хоёр сэжигтнийг хөнөөн, бусдыг нь баривчилжээ. Сэжигтнүүдийн нэг нь мэдүүлэгтээ Хисела Мотагийн амийг хөнөөснийхөө төлөө 29 мянган америк долларын шан авснаа хүлээсэн гэж орон нутгийн хэвлэлүүд мэдээлж байна. Хисела Мота нь Темиско хотын даргад нэр дэвшихдээ хар тамхины наймаа, бусад гэмт хэрэгтэй эрчимтэй тэмцэх амлалт өгсөн юм.

Иймээс Мотагийн аллагыг зохион байгуулалттай гэмт хэргийн бүлэглэл, тэр дундаа хар тамхины наймаачид захиалсан байж магадгүй гэж цагдаа нар таамаглаж байна. 100-гаад мянган хүнтэй Темиско хот нь аялал жуулчлал, аж үйлдвэрийн төвлөрсөн бүсэд тооцогддог. Сүүлийн жилүүдэд тус хотод гэмт бүлэглэлүүд иргэдийг барьцаалах, сүрдүүлж мөнгө дээрэмдэх хэрэг элбэг гарах болжээ. "Ассошиетэд прэсс" агентлагийн уламжилснаар өнгөрсөн 10 жилд Мексик улсад 100-гаад хотын дарга бусдын гарт амь үрэгдсэн юм байна.