Өчигдөр Умард Солонгост орон нутгийн цагаар өглөөний 10 цагт устөрөгчийн бөмбөг амжилттай туршсан талаар тус улсын төрийн мэдлийн төв телевиз мэдээлсэн. Энэ мэдэгдэл үнэн эсэхийг нягтлахаар Өмнөд Солонгосын гадаад хэргийн яам шуурхай хуралдсан бөгөөд ерөнхийлөгч Пак Кын Хе Үндэсний аюулгүй байдлын зөвлөлөө зарлан хуралдуулсан байна.

Үүнээс гадна Японы ерөнхий сайдын ажлын албанд холбогдох яам агентлагуудын дээд албан тушаалтнууд шуурхай уулзалт хийжээ. Умард Солонгос устөрөгчийн бөмбөг туршсан явдлыг Өмнөд Солонгосын ерөнхийлөгч Пак Кын Хе, Японы ерөнхий сайд Шинзо Абэ нар үндэсний аюулгүй байдалд нь ноцтой заналхийлсэн үйлдэл гэж үзэн, эрс буруушааж байгаагаа мэдэгдээд байна. Харин  Умардтай сайн харилцаатай гэгддэг Хятадын засгийн газар энэ талаарх байр сууриа илэрхийлээгүй байна.

Умард Солонгос устөрөгчийн бөмбөг туршина гэдгээ Хятадад урьдчилж мэдэгдээгүй байсан гэж Өмнөд Солонгосын төрийн мэдлийн Ёнхап агентлаг уламжиллаа. Хэрэв үнэн гэдэг нь батлагдвал энэ удаагийн туршилт Умардын хийсэн цөмийн дөрөв дэх туршилт, харин энэ туршилтандаа устөрөгчийн бөмбөг ашигласан анхны тохиолдол болох юм.

Өмнө нь 2006, 2009, 2013 онуудад тус улс цөмийн бөмбөг туршиж байсан. Харин энэ удаад туршсан устөрөгчийн бөмбөг нь хүчин чадлаараа цөмийн бөмбөгнөөс илүүд тооцогддог байна. НҮБ-ын Аюулгүйн зөвлөл өнөөдөр Нью-Йорк хотод энэ асуудлаар шуурхай хуралдахаар төлөвлөж байна. Энэ уулзалтаар Умардын эсрэг нэмэлт хориг арга хэмжээ тогтоох шийдвэр гарна гэж шинжээчид таамаглаж байна.