Энэ өдрүүдэд Япон улсын зүүн болон зүүн умард нутгаар их хэмжээний цас орж байна. Токио хотод цасны зузаан өнөө өглөөний байдлаар 6 см хүрсэн талаар холбогдох албаныхан мэдээллээ. Үүнээс үүдэн “Токаидо Шинкансен” хурдан галт тэрэг түр хугацаагаар зогсоход хүрээд байна. Мөн Токио хотоос Нагано муж руу чиглэсэн галт тэрэгний замыг түр хааж, дотоодын 100 гаруй нислэгийг цуцалжээ.

Гэнэт их хэмжээгээр орсон цаснаас үүдэн халтиргаа гулгаа эрс нэмэгдэж, осол гарах магадлал ихэссэн болохыг холбогдох албаныхан ард иргэдэд анхааруулж байгаа аж. Өнөөдөр Токиогийн хурдны зам дээр суудлын автомашин осолдож, автомашиныг жолоодож явсан 60-аад настай эрэгтэй хөнгөн гэмтэл авсан талаар Эн-Эйч-Кэй агентлаг мэдээллээ.

Агаарын хүйтэн урсгалын шилжилтээс үүдэлтэйгээр Японы ихэнх бүс нутагт хур тунадас маргааш хүртэл үргэлжлэн орох төлөвтэй байна. Тус улсын цаг уур судлалын агентлагийн мэдээлснээр орон нутгийн цагаар маргааш өглөөний 6 цаг хүртэл Японы Тохокуги бүс нутгаар 80 см хүртэл, харин Хоккайдо, Хокурику, Токаи зэрэг бүс нутгаар 60 см хүртэл зузаан хур тунадас унах төлөвтэй байгаа юм.