АНУ-ын зүүн эргийн бүс нутгаар хүчтэй цасан шуурга шуурч байгаа. Өнөөдөр Вашингтон хот болон Атлантын далайн эрэг хавийн бүс нутагт энэ шуурга улам ширүүсэх төлөвтэй байгааг тус улсын цаг уурын хүрээлэнгээс анхааруулж байна. Холбогдох албаныхны мэдээлснээр өнөөдөр үдээс хойш салхилах цасан шуургаар хэдхэн цагийн дотор 60 см хүртэл зузаан хур тунадас унах төлөвтэй байгаа гэнэ.

Үүнээс гадна хүчтэй шуурганы улмаас эрчим хүч тасрах, автозамын хөдөлгөөн зогсох, нислэг хойшлогдох зэрэг үр дагавар гарч болзошгүй байна. Эдгээр анхааруулгатай холбогдуулан шуурганаас өмнө хоол хүнсний нөөцөө цуглуулах гэсэн хүмүүсийн урт дараалал дэлгүүр хоршоодод үүсээд байгаа юм. Албаныхны мэдээлж байгаагаар цасан шуурга ширүүсэх бүс нутгуудад нийт 50 сая гаруй хүн амьдардаг байна. Одоогоор АНУ-ын Мэриленд, Умард Каролина, Жоржиа, Пенсильвани, Виржини зэрэг муж улсад онц байдал зарлаад байна. Мөн цаг уурын онц аюултай үзэгдлээс үүдэн Умард Каролинад хоёр жолооч, Теннеси, Мэриленд зэрэг муж улсад тус бүр нэг хүн амь насаа алдсан юм.

Мөн АНУ-ын нийслэл Вашингтон хотод нийтийн тээврийн систем энэ амралтын өдрүүдээр ажиллахгүй ажээ.