Өчигдөр НҮБ-ын Эмэгтэйчүүдийг ялгаварлан гадуурхах бүх хэлбэрийг устгах хороо дэлхийн улс орнуудын эмэгтэйчүүдийн эрхийн төлөв байдлыг хэлэлцэх уулзалтаа Швейцарийн Женев хотноо эхэлсэн байна. Эхний өдөр тус хороо Япон, Исланд, Швед болон манай улсын төрийн бус байгууллагуудын төлөөлөлтэй албан бус уулзалт зохион байгуулжээ.

Энэ уулзалтад Японоос хамгийн олон тооны төрийн бус байгууллага оролцож, дэлхийн 2-р дайны үед Япон цэргүүдэд үйлчлэн, бэлгийн боолчлолд өртөж байсан эмэгтэйчүүдийн асуудлыг голлон хөндсөн байна. Түүхчдийн гаргасан тоон мэдээгээр, Азийн хэд хэдэн орон, тэр дундаа Солонгосын олон арван мянган эмэгтэй дайны цагт Япон цэргүүдэд үйлчлэхээр дэн буудлуудад албадан дайчлагдсан байдаг юм байна. Энэ хэрэгт албан ёсоор уучлал хүсэх, мөн олон улсын хуулийн өмнө хариуцлага хүлээх шаардлагатай гэж Өмнөд Солонгосын төрийн бус байгууллагууд үзэж байгаа юм.

Харин “Дайны цагийн бэлгийн боолчлолын талаар үндэстэй баримт нотолгоо бий нөхцөлд эдгээрийг шалган, албан ёсоор уучлал гуйх нь зөв. Харин ийм нотолгоогүй бол Японы Засгийн газар уучлал гуйх боломжгүй” гэж Японы төрийн бус байгууллагууд үзэж байна. 

Япон улс дахь эмэгтэйчүүдийн эрхийн төлөв байдлыг НҮБ-ын хороо өнөөдөр албан ёсоор авч хэлэлцэх юм. Дэлхийн хоёрдугаар дайны үед Японы цэргүүдийг зугаацуулах үйлчилгээнд 200 мянга орчим Солонгос эмэгтэй албан хүчээр дайчлагдсан гэх Сөүлийн талын мэдээ байдаг.

Гэхдээ эдгээр эмэгтэйчүүдийн ердөө 238 нь бэлгийн боолчлолд өртсөн хохирогч гэж албан ёсоор тодорхойлуулсан байдгаас одоо ердөө 47 хохирогч амьд мэнд үлдсэн юм. Хоёр орны харилцаан дахь эмзэг сэдвийн нэгд тооцогддог тус асуудлаар Өмнөд Солонгосын Засгийн газар Японтой өнгөрсөн оны сүүлээр хэлэлцээрт хүрсэн. Энэхүү хэлэлцээрийн хүрээнд Япон нэг тэрбум иен буюу 8.3 сая америк долларын сан байгуулж, хохирогчдод нөхөн төлбөр олгохоор болсон юм.