Шууд Chart

Мексикийн шоронгоос тансаг хэрэглээний бараа бүтээгдэхүүн илэрчээ

2016-02-16 14:38:14

Өнгөрсөн долоо хоногийн пүрэв гарагт Мексикийн хойд хэсэгт байрлах Топо Чико шоронд хар тамхины бүлэглэлийн гишүүдийн хооронд мөргөлдөөн гарч, улмаар 49 хоригдол амь үрэгдсэн. Нэг цаг орчим үргэлжилсэн ширүүн тэмцлийн дараа шоронгийн удирдлага нөхцөл байдлыг хяналтандаа оруулж, энэ хэрэгтэй холбогдуулан мөрдөн шалгалт явуулж эхлээд байна.

Холбогдох албаныхны мэдээлснээр “Лос-Сетас” гэх хар тамхины бүлэглэлийн салбар бүлгүүд шоронд эрх мэдлээ тогтоохын төлөө тэмцэлдэж, саваа, алх, хутга зэргээр зэвсэглэн үймээнд оролцсон байна. Энэ хэрэгтэй холбогдуулан Топо Чико шоронд хийж байгаа нарийвчилсан мөрдлөг шалгалтын үеэр зарим хорих өрөөнөөс зурагт, агааржуулагч зэрэг тансаг хэрэглээний бараа бүтээгдэхүүн илэрсэн талаар холбогдох албаныхан мэдээллээ.

Даац нь 35 хувиар хэтэрсэн Топо Чико шоронд 3800 гаруй хоригдол хоригдож байжээ. Эдгээр хоригдлын олонх нь агааржуулагчгүй, гэрэл үздэггүй өрөөнд ундны усаар гачигдан, хүнд нөхцөлд хоригдож байх хооронд зохион байгуулалттай гэмт хэргийн бүлэглэлийн толгойлогчдын өрөөг тусгайлан тохижуулж, тав тухыг дээд зэргээр хангасан байсан нь ийнхүү ил болж, шуугиан тарилаа.

Мужийн прокурорын газрын мэдэгдэлд дурдсанаар зарим хорих өрөөг өргөн ор, ариун цэврийн тансаг тоноглолтой өрөө, өргөн дэлгэцтэй зурагтаар тохижуулсан байжээ. Мөн жижиг хөргөгч, загасны аквариум, агаар цэвэршүүлэгч болон зөөврийн саун хүртэл илэрсэн байна.

Үүнээс гадна хоригдлуудад хууль худалдаалдаг байсан хүнсний бүтээгдэхүүнүүдийг агуулсан 280 тавиурыг цагдаа нар хураагаад байгаа юм. Цагдаа нар энэ даваа гарагаас эхлэн мөргөлдөөний үеэр амиа алдсан 49 хоригдлын хэргийг нэг бүрчлэн шалгаж байна. Энэ хооронд шоронгийн үймээнийг зохион байгуулсан гэх хар тамхины бүлэглэлийн толгойлогчид болон бусад 230 гаруй хоригдлыг өөр шоронгуудад шилжүүлэн хорьж буй юм байна.

Нийтэлсэн: Э.Энхрэл

Мексикийн шоронгоос тансаг хэрэглээний бараа бүтээгдэхүүн илэрчээ  
Үзсэн: 817 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй