Өчигдөр Францын хууль тогтоогчид улсдаа тогтоосон онц байдлын үргэлжлэх хугацааг дахин гурван сар сунгах тухай хуулийн төслийг хэлэлцэж, үнэмлэхүй олонхийн саналаар дэмжиж баталжээ. Өнгөрсөн оны 11 дүгээр сард тус улсын нийслэл Парис хотноо цуврал террорист халдлага болж, 130-аад хүн амь үрэгдсэний дараа Франц улс даяар үндэсний хэмжээний онц байдал зарласан юм.

Онц байдлын хүрээнд Францын цагдаа нарын бүрэн эрхийг өргөжүүлж, шүүхийн зөвшөөрөлгүйгээр нэгжлэг шалгалт явуулах, мөн сэжиг бүхий этгээдийг баривчлан саатуулах зөвшөөрөл олгосон. Мөн тус улсын эрх баригчид зарим нутаг дэвсгэрт тодорхой цаг хугацаагаар хүн болон ачаа тээврийн хэрэгслийн хөдөлгөөнийг хязгаарлах бүрэн эрх эдэлж байгаа юм. Энэ журам нь хүний суурь эрх, эрх чөлөөг боогдуулж байна гэж хүний эрхийн байгууллагууд шүүмжилж байгааг үл харгалзан Францын эрх баригчид онц байдлын дэглэмээ хоёр дахь удаагаа гурван сарын хугацаагаар сунгалаа.

Энэ нь алан хядах ажиллагаа дахин гарах магадлал өндөр байгаагаас үүдэлтэй гэж тус улсын Дотоод хэргийн сайд Бернар Казнев тайлбарлалаа. Францын парламент өчигдөр онц байдлын дэглэмийг сунгах эсэх асуудлаар санал хураахад хууль тогтоогчдын 212 нь дэмжиж, 31 нь эсэргүүцсэн санал өгчээ. Үүний өмнө тус хуулийн төсөл Сенатад хэлэлцэгдэн, дэмжлэг авсан. Ингэснээр Франц улсад ирэх тавдугаар сарын 26 хүртэл онц байдлын дэглэм үргэлжлэн үйлчлэхээр болж байна.