Өчигдөр Кубын нийслэл Гавана хотноо АНУ болон Кубын төлөөлөгчид хоёр орны хооронд иргэний агаарын тээврийн байнгын нислэгийг сэргээх хэлэлцээрт гарын үсэг зурлаа. Зургаадугаар сараас эхлэн хэрэгжих энэ хэлэлцээрийн дүнд сүүлийн 50 гаруй жилд анх удаа хоёр орны хооронд иргэний агаарын тээврийн онгоцууд өдөр тутам арилжааны нислэг үйлдэх боломж нээгдэж байна. 1970-аад оноос хойш АНУ-ын нисэх онгоцууд Куба руу хязгаарлагдмал тооны захиалгат нислэг үйлдсээр өнөөг хүрсэн юм.

Харин шинэ хэлэлцээрийн хүрээнд Кубын 10 байршил руу өдөр бүр 110 хүртэлх тооны арилжааны нислэг үйлдэхээр болжээ. Хэлэлцээрт гарын үсэг зурах ёслол болж өндөрлөсний дараа АНУ-ын Тээврийн яам өөрийн орны иргэний агаарын тээврийн компаниудын дунд эдгээр арилжааны нислэгийг үйлдэх эрхийн нээлттэй тендер зарласан байна. Өнгөрсөн онд АНУ-ын 160 мянга гаруй жуулчин Куба улсад аялсан гэх тооцоо бий. Харин энэ онд хоёр орны хооронд арилжааны нислэг нээгдсэнээр энэ тоо эрс өсөх хандлагатай байгаа юм.

АНУ-ын ерөнхийлөгч Барак Обама, Кубын удирдагч Рауль Кастро нар хоёр орны харилцааг хэвийн түвшинд хүргэхээр тохиролцсоноос хойш Америк, Кубын худалдаа, эдийн засгийн харилцаанд хамгийн том дэвшил авчирсан хэлэлцээр бол гэж энэхүү хэлэлцээрийг мэргэжилтнүүд үнэлжээ. Гэхдээ одоогийн үйлдэж байгаагаас тав дахин олон тооны нислэгээр очих америк жуулчдыг Кубын хуучирч муудсан дэд бүтэц, аялал жуулчлалын салбарынх нь цомхон бүтэц хүлээн авч, үйлчлэхэд бэлэн үү гэдэг асуудал олон улсын анхаарлыг татаж байгаа юм.