Өчигдөр Туркийн нийслэл Анкара хотын зэвсэгт хүчний төв байр болон засгийн газар, бусад төрийн байгууллагууд зэрэгцэн байрладаг өргөн чөлөөнд автомашинд суурилуулсан тэсрэх бөмбөг дэлбэрчээ. Халдлагын улмаас 28 хүн амь үрэгдэж, мөн олон арван хүн гэмтэж шархадсан талаар "Ройтерс" агентлаг мэдээллээ.

Тус улсын парламентын ордонгоос 500 хүрэхгүй метрийн зайд орших хоёр замын уулзварт тэсрэх бөмбөгөөр дүүргэсэн автомашин дэлбэрсний улмаас амь үрэгдсэн 28 хүний дунд цэргүүдээс гадна энгийн иргэд байгаа юм байна. Мөн 61 хүн гэмтэж шархадсан гэж Туркийн шадар сайд Нуман Куртулмуш мэдэгдлээ.

Учир нь гэрлэн дохио хүлээн замын уулзварт зогсож байсан цэргийн автобуснууд дэлбэрэлтэд өртжээ. НАТО-гийн гишүүн Турк улсын эрх баригчид энэхүү дэлбэрэлтийг алан хядагчдын зохион байгуулсан халдлага байсан гэж мэдэгдээд байна. Өнгөрсөн онд тус улсын нутаг дэвсгэрт алан хядагчид удаа дараа халдлага дэлбэрэлт үйлдсэний дийлэнхийг "Исламын улс" бүлэглэл зохион байгуулсан гэж үзэж байгаа. Харин энэ удаагийн халдлагын ард Туркт алан хядагч байгууллагын жагсаалтад бүртгэсэн байдаг "Курдын ажилчдын нам" бүлгийнхэн байж магадгүй гэж тус улсын батлан хамгаалахын  албаны хүмүүс таамаглаж байна.

Энэ халдлагын хариуд алан хядагчдын эсрэг тэмцлээ улам бүр эрчимжүүлнэ гэдгээ Туркийн ерөнхийлөгч Режеп Тайип Эрдоган мэдэгдэв. Тэрээр  энэхүү халдлагатай холбогдуулан Азербайжанд хийх байсан айлчлалаа хойшлуулж,  Туркийн ерөнхий сайд Ахмет Давут-оглу Белгийн нийслэл Брюссель хотноо дүрвэгчдийн хямралын талаар хэлэлцэх уулзалтад оролцох байсан айлчлалаа цуцалжээ.