Хиймэл дагуулаас авсан зургаас үзэхэд БНХАУ Өмнөд Хятадын тэнгис дэх газар нутгийн маргаантай бүсэд байрладаг бааздаа газар-агаар ангиллын пуужин харвах төхөөрөмж байрлуулсан байж болзошгүй гэж АНУ-ын Төрийн департамент мэдэгдлээ. Өмнөд Хятадын тэнгис дэх Параселийн бүлэг аралд багтдаг Вуди арлыг БНХАУ-аас гадна Тайвань, Вьетнамын тал өөрсдийн газар нутгийн бүрэлдэхүүн хэсэг гэж үздэг юм.

Хэрэв Хятад улс Вуди аралд газар-агаар ангиллын пуужин харвах төхөөрөмжөө байрлуулсан нь нотлогдвол Өмнөд Хятадын тэнгисийн бүс нутагт үүсээд байгаа хурцадмал байдлыг улам дэвэргэнэ гэдгийг шинжээчид анхааруулж байна. Өчигдөр Хятадын Гадаад хэргийн сайд Ван И Австрали улсад айлчлан, тус улсын Гадаад хэргийн сайдтай уулзсаны дараа сэтгүүлчидтэй ярилцах үеэрээ Өмнөд Хятадын тэнгист пуужин харвах систем байрлуулсан гэдэг нь өрнөдийн хэвлэлүүдийн зохиосон, ор үндэсгүй мэдээлэл гэх тайлбарыг өгсөн байна.

Мөн олон улсын хууль тогтоомжид заасны дагуу БНХАУ Вуди арал дээр өөрийгөө хамгаалах тодорхой тооны байгууламжийг барьж байгуулах эрхтэй гэж үзэж байгаагаа Ван И мэдэгдэв. АНУ болон Зүүн Өмнөд Азийн улс орнууд Өмнөд Хятадын тэнгисийг цэрэгжүүлэхгүй байх талаар Хятадад хандан удаа дараа уриалга гаргаж байгаа юм. Хятадын Гадаад хэргийн сайд Ван И "Энэ уриалгыг Хятад төдийгүй бүс нутгийн болон бүс нутгаас гаднах улс орнууд бүгд хүлээн авч, хэрэгжүүлэх хэрэгтэй..." гэсэн байна.