Өчигдөр Европын холбооны гишүүн Унгар улсын Ерөнхий сайд Виктор Орбан ОХУ-д айлчиллаа. Энэ айлчлал Оросын Ерөнхийлөгч Владимир Путин өнгөрсөн онд Унгарт айлчилсан өдрөөс яг нэг жилийн дараа тохиосон гэдгээрээ онцлог юм. Виктор Орбан өчигдөр Оросын Ерөнхийлөгч Владимир Путинтэй уулзах үеэрээ Европын холбоонд нүүрлэсэн дүрвэгчдийн хямралын талаар санал солилцож, мөн цөмийн эрчим хүч, байгалийн хийн салбарт хамтран ажиллах талаар ярилцсан байна. Москва дахь Унгарын Элчин сайдын яамны мэдээгээр ойрын жилүүдэд хоёр орны худалдааны эргэлт 50 орчим хувиар буурчээ. Нэгэн цагт Унгарын худалдааны хоёр дахь том түнш байсан Орос өнөөдөр энэ үзүүлэлтээр ердөө 13-аас 14-р байрт бичигдэх болсон юм.

Иймээс Владимир Путин, Виктор Орбан нар энэ удаагийн уулзалтынхаа үеэр худалдаа, эрчим хүч, технологи, соёлын салбаруудад хамтын ажиллагаагаа өргөжүүлэх талаар голлон хэлэлцжээ. Өнгөрсөн онд Ерөнхийлөгч Путин Унгар улсад айлчлах үеэрээ хэд хэдэн чухал хэлэлцээрт гарын үсэг зурсан юм. Түүний дотор ЗХУ-аас Унгарт байгуулсан "Парк-2" цөмийн цахилгаан станцыг өргөтгөх 12.5 тэрбум еврогийн гэрээ, мөн ОХУ-аас Унгарт байгалийн хий нийлүүлэх шинэчилсэн гэрээ зэрэг багтаж байсан юм. Унгар улсын байгалийн хийн хэрэглээний 85 хувийг Орос улс дангаараа нийлүүлдэг.  

Москвад хийсэн энэ удаагийн айлчлалаараа Унгарын Ерөнхий сайд өнгөрсөн онд Путины айлчлалын үеэр хоёр орны харилцаанд гарсан ахиц дэвшлийг бататган бэхжүүлэхийг зорьсон гэж ажиглагчид дүгнэж байна. ОХУ Крымыг өөртөө нэгтгэн авсантай холбогдуулан тогтоосон хориг арга хэмжээгээ Европын холбоо дахин зургаан сараар сунгаад байгаа. Харин Оросыг ганцаардуулах энэ бодлого Европын холбоонд өөрт нь томоохон хохирол учруулж байна гэж Виктор Орбан шүүмжилсээр өнөөг хүрсэн юм. Тэрээр Оросын оролцоогүйгээр Европын холбоо эрчим хүчний салбарын аюулгүй байдлаа бүрэн хангаж чадахгүй гэдэг байр сууриа өчигдөр дахин илэрхийлсэн байна.