Умард Солонгосын удирдагч асан Ким Чен Ир мэндэлсний 74 жилийн ой мягмар гарагт болж өнгөрлөө. Ким Чен Ир таалал төгссөний дараа 2011 онд засгийн эрхийг авсан түүний хүү Ким Чен Ун өөрийн эцгийн мэндэлсэн хоёрдугаар сарын 16-ны өдрийг “Гэрэлт одны өдөр” гэж нэрлэн, үндэсний баярын өдөр болгон зарласан юм.

Тэр цаг үеэс хойш “Гэрэлт одны өдөр”-ийг тэмдэглээд тав дахь жилийнхээ нүүрийг үзэж байгаа Умард Солонгосын ард түмэн энэ онд ч уламжлал ёсоор тус улсын өнцөг булан бүрт босгосон Ким Чен Ирийн хөшөөнд цэцэг өргөн, хүндэтгэл үзүүллээ. Умардын эрх баригчид улаан хайтан цэцгийг их удирдагч агсныхаа дурсгалд зориулан Кимченириа гэж дуудах болсон. Энэхүү цэцгийн 10 мянган ширхэгтэй баглааг даваа гарагт Пхеньяны Мансу уулан дахь Ким Чен Ирийн их хөшөөний өмнө хүндэтгэл болгон өргөжээ.

Мөн өдөр Ким Чен Ирийн мэндэлсэн өдөрт зориулсан үзэсгэлэн Пхеньян хотноо үүд хаалгаа нээсэн байна. Энэ үзэсгэлэнд БНАСАУ-ын саяхан хөөргөсөн “Кванмёнсон” хиймэл дагуул тээвэрлэсэн пуужингийн жижигрүүлсэн загварыг байршуулан, олны хүртээл болголоо.

Эргэн сануулахад, Умардын эрх баригчид “Кванмёнсон-4” харилцаа холбооны хиймэл дагуулаа дэлхийн тойрог замд амжилттай байршсан болохыг өнгөрсөн долоо хоногт зарласан юм. Ким Чен Ир Солонгосын хойгийн хамгийн өндөр уул болох Пэкту уулын өвөрт мэндэлж, энэ үеэр тэнгэрт алтан гадас од тодрон үзэгдсэн гэх домог яриа байдаг. Энэ ярианд үндэслэн, Умардын ард түмэн хиймэл дагуулаа “Кванмёнсон” буюу "Алтан гадас од" гэж нэрлэсэн юм.

“Гэрэлт одны өдөр”-ийг тэмдэглэж байгаа Умардын ард түмэн их удирдагч агсныхаа талаар дурсан ярихдаа үг хэлээ сайтар анхаарч, заавал “Манай генерал”, “Манай их генерал” гэх зэргээр хүндэтгэн дуудаж байна. Ким Чен Ир Умард Солонгосын засгийн эрхэнд байсан 17 жилийнхээ хугацаанд “Сонгун” цэргийн номлолынхоо хүрээнд пуужингийн болон цөмийн хөтөлбөрөө мэдэгдэхүйц хэмжээгээр өргөжүүлсэн юм.