Цэвэр цусны үүлдрийн нохойг хадгалан хамгаалах, тэдний талаар олон нийтэд таниулах зорилготой гурван гол шоу тэмцээний нэг болох "Вестминстр Кэннэл" клубын нохдын тэмцээн Нью-Йорк хотноо зохион байгуулагдлаа. Энэ онд 140 дэх удаагаа болж байгаа тус тэмцээнд 150 гаруй үүлдрийн 3000 гаруй нохой өнгө зүс, хурд хүч, авхаалж самбаагаараа өрсөлдсөн байна.

Хоёр өдөр үргэлжилдэг үндэсний хэмжээний энэ тэмцээнийг 1877 онд анх зохион байгуулж байсан түүхтэй. Энэ шоу тэмцээнд оролцож байгаа нохдыг үүлдэр тус бүрээр нь өрсөлдүүлж, энэ өрсөлдөөнөөс шалгарсан нохдыг эцсийн шигшээ тэмцээнд оруулан, шоуны ялагчийг тодруулдаг байна. Энэ онд тус тэмцээнд долоон үүлдрийн ноход шинээр өрсөлдөж байгаа нь бас нэгэн онцлог болж байгаа юм. Цэвэр цусны үүлдрийн нохдыг л оролцуулдаг өндөр жишигтэй байсан тус тэмцээн сүүлийн жилүүдэд зарим төрлийн тэмцээндээ холимог үүлдрийн нохдыг оролцуулах уян хатан бодлого баримталж эхлээд байна.

Үүний жишээ болж, энэ оны үндэсний нохойн шоу тэмцээний хурд хүч шалгасан төрөлд  холимог үүлдрийн ноход оролцох боломж улам бүр нэмэгджээ. Энэ боломжийг ашиглан холимог цусны 26 нохой тус төрөлд хүч үзсэн нь өнгөрсөн оныхоос гурав дахин нэмэгдсэн үзүүлэлт юм байна. АНУ-ын бүх муж улсын төлөөлөл болсон нохдыг оролцуулсан энэ удаагийн шоу тэмцээн хүний хамгийн дотны анд гэгддэг нохойг хайрлан хамгаалагчид олширч, олон нийтийн дунд нохдын талаарх мэдлэг ойлголт улам бүр нэмэгдэж байгааг харууллаа гэж ажиглагчид дүгнэж байна.