Хэт их хэрэглээнд суурилсан өнөөгийн нийгэмд тулгарч байгаа олон асуудлын нэг бол хог хаягдал. Энэ асуудал хөгжиж байгаа төдийгүй өндөр хөгжилтэй олон орны санааг зовоох болсон. Хог хаягдал дахин боловсруулах олон үйлдвэр үүд хаалгаа барьж, боловсруулаагүй орхисон хог хаягдлаа хувийн эзэмшил газарт хууль бусаар хаяж байгааг “Скай Ньюс” байгууллагын сая хийсэн судалгаагаар тогтоожээ.

Энэ мэт газрын ойролцоо оршин суудаг хүмүүс хог хаягдлын эхүүн үнэрт аж төрж байгаа бол цаашид эдгээр хаягдлыг цэвэрлэхэд олон сая америк доллар шаардагдана гэдгийг мэргэжилтнүүд хэлж байна. “Скай Ньюс” байгууллага хувийн эзэмшлийн газруудад 60 гаруй хог хаягдлын цэг үүссэн болохыг өөрийн явуулсан судалгаагаар тогтоосон байна. Мөн Их Британийн Байгаль орчны агентлаг 2014-2015 оны хооронд хууль бусаар хог хаягдал овоолсон 50 орчим цэгийг илрүүлж, цэвэрлээд байна.

Их Британийн Йоркшир гүнлэгт байрлах дахин боловсруулах үйлдвэр өнгөрсөн онд дампуурахдаа 4.5 метр зузаан хог хаягдлын овоо үлдээжээ. Энэ хог хаягдлыг цэвэрлэхийн тулд 1.5 сая америк доллар зарцуулж байгаа гэх мэдээ байна. Цаашид хог хаягдлын энэ мэт цэгүүд оршин суугчдын эрүүл мэндэд хор хохирол учруулахаас сэргийлэхийн тулд төрөөс илүү далайцтай арга хэмжээ хэрэгжүүлэх шаардлагатай байгааг судлаачид анхааруулж байгаа.

Харин Их Британийн байгаль орчны агентлаг тус улс дахь хог хаягдлын цэгүүдийн 95 хувь нь сайтар зохион байгуулалттай, тухайн бүс нутгийнхаа хог хаягдлыг сайтар цэвэрлэдэг гэх тайлбарыг өгсөн байна.