Монголын иргэд нүүрсний зуух ашиглаж, эрүүл мэнд, амь насаа эрсдэлд оруулж байна гэж "Ассошиэйтед Пресс" агентлаг Монгол-Германы ашигт малтмал, технологийн их сургуулийн судалгаанаас иш татан уламжилжээ. Дэлхийн хамгийн хүйтэн нийслэлүүдийн тоонд багтдаг манай нийслэл Улаанбаатарт айл өрхүүдийг дулаанаар хангахад хямд, элбэг олдоцтой түүхий нүүрсийг голлон хэрэглэдэг болохыг тус агентлаг онцолсон байна. Мөн Налайх дахь 120 орчим нүүрсний уурхай Улаанбаатар хотын нийт нүүрсний хэрэглээний 3-ны 2-ыг нийлүүлдэг тухай мэдээлжээ.

Тодруулбал, Улаанбаатар хот жилд 600 мянга орчим тонн нүүрс хэрэглэдгийн 400 мянган тонныг нь Налайхын нүүрсний уурхайнуудаас олборлодог гэж Монгол-Германы ашигт малтмал, технологийн их сургуулийн ахлах судлаач Сэрээтэр тооцоолсон байна. Энэ нүүрсний дийлэнх хэсгийг төвийн халаалт, ус хангамжийн системд холбогдоогүй гэр хорооллын айл өрхүүд түлдэг. Улаанбаатар хотын утааны 80 хувь нь гэр хорооллын эдгээр зуухнаас ялгардаг. Улаанбаатар хотын зарим хэсгийн 1 куб метр агаар дахь нарийн ширхэгт тоосонцрын хэмжээ 200 микрограмм хүрсэн нь Дэлхийн эрүүл мэндийн байгууллагын эрүүл мэндэд аюулгүй гэж зөвшөөрсөн хэмжээнээс даруй 20 дахин их байгаа юм.

Харин нэгэн судлаачийн хэлснээр гэр хорооллын зарим бүсэд энэ үзүүлэлт 400 микрограмм ч хүрсэн. Дэлхийн хамгийн их агаарын бохирдолтой гэгддэг Дели хотын хэсгийн 1 куб метр агаар дахь нарийн ширхэгт тоосонцрын хэмжээ 153 микрограмм, харин өнгөрсөн онд хоёр ч удаа агаарын бохирдлын хамгийн дээд түвшний түгшүүр зарлаад амжсан Бээжин хотод 56 микрограмм байгаатай харьцуулахад Улаанбаатарын гэр хорооллын утаа гамшгийн хэмжээнд хүрсэн болохыг "Ассошиэйтед Пресс" агентлаг онцолж байна.

Эндээс манай нийслэлийн агаарын бохирдол олон улсын анхааралд өртөж эхэлснийг харж болохоор байна. Өнгөрсөн 12 дугаар сард Парис хотноо зохион байгуулагдсан Уур амьсгалын өөрчлөлтийн асуудлаарх НҮБ-ын бага хурлаар улс орнуудын удирдагчид дэлхийн дулаарлыг 1.5-2 хэмд тогтоон барихаар тохиролцож, энэ хүрээнд ирэх жилүүдэд нүүрс болон бусад чулуужсан түлшний хэрэглээнээс татгалзахаар зорьж байна. Үүнээс үүдэлтэйгээр нүүрсний экспортоос хараат Монгол Улсын эдийн засаг төдийгүй, байгаль орчны хувьд 2020 онд хэрэгжиж эхлэх "Уур амьсгалын асуудлаарх шинэ суурь конвенц" томоохон өөрчлөлт авчирна гэж "Ассошиэйтед Пресс" агентлаг дүгнэж байна.