Туркийн нийслэл Анкара хотод автомашинд суурилуулсан их хэмжээний тэсрэх бөмбөг дэлбэрч, 28 хүн амь үрэгдэн, 60 гаруй хүн гэмтэж шархадсан талаар бид та бүхэнд мэдээлсэн. Энэ халдлагыг Туркт алан хядагч байгууллага гэж тооцдог Курдын хөдөлмөрчдийн намтай хамтран ажиллаж байсан Сирийн курд дайчин үйлдсэнийг тогтоосон гэж өчигдөр Туркийн ерөнхий сайд Ахмет Давут-оглу мэдэгдсэн байна. “Ардыг хамгаалах анги” нэртэй бүлэгт харьяалагддаг курдын босогчид нь АНУ-ын дэмжлэгтэйгээр Сирийн Турктэй хиллэдэг хойд бүс нутагт "Исламын улс" алан хядагч бүлэглэлийн эсрэг тэмцэлд оролцож байгаа юм.

Харин эдгээр босогчид Туркт лхагва гарагт болсон террорист халдлагатай холбоотой гэх хөдөлшгүй баримт олсон гэж Туркийн ерөнхий сайд мэдэгдээд, эдгээр босогчдын эсрэг тэмцэхэд НАТО-гийн холбоотнууд нь хамтран ажиллана гэдэгт итгэж байгаагаа илэрхийлсэн байна. Өчигдөр Сирийн хойд хэсэгт агаарын цэргийн ажиллагаа явуулж байгаа Туркийн байлдааны онгоцууд курдын босогчдын байршилд агаараас цохилт өгсөн талаар батлан хамгаалахын эх сурвалжууд мэдээлж байна. Давут-оглу энэ ажиллагааг цаашид үргэлжлүүлэн, Анкарагийн халдлагыг үйлдсэн гэм буруутнуудад хариуцлагыг нь хүлээлгэхээ амласан.

Туркийн ерөнхийлөгч Режеп Таийп Эрдоган ч ерөнхий сайдынхаа мэдэгдлийг баталгаажуулан, Турк дэх Курдын хөдөлмөрчдийн нам болон Сирийн “Ардыг хамгаалах нэгж” лхагва гарагийн халдлагад буруутай гэх баримт олдсон гэж мэдэгдлээ.

Харин Туркийн эрх баригчдын буруутгаж байгаа эдгээр бүлэглэл халдлагад оролцоогүй, зохион байгуулагчидтай нь ямар ч холбоогүй гэдгээ хариу мэдэгдэсэн. Энэ үйл явдал Турк улс Сирийн хямралд улам бүр татагдан орж байгааг нотлон харууллаа гэж ажиглагчид дүгнэж байна.