АНУ-ын Ерөнхийлөгч Барак Обама ирэх сард Куба улсад айлчлахаар болсныг Цагаан ордны хэвлэлийн төлөөлөгч өчигдөр мэдэгдлээ. Хүйтэн дайны үед дипломат харилцаагаа тасласнаас хойш 50 гаруй жилийн дараа буюу өнгөрсөн онд харилцаагаа эргэн сэргээсэн тус хоёр орны хувьд энэхүү айлчлал түүхэн чухал ач холбогдолтой болохыг ажиглагчид онцолж байна. Кубад АНУ-ын Ерөнхийлөгч 1928 оноос хойш анх удаа айлчлахаар болсон нь энэ юм. Барак Обама ирэх гуравдугаар сарын 21, 22-ны өдрүүдэд Кубад айлчлах үеэрээ тус улсын Ерөнхийлөгч Рауль Кастротой уулзана.

Мөн тэрээр бизнес эрхлэгчид, иргэдийнх нь янз бүрийн давхаргын төлөөлөлтэй уулзахын зэрэгцээ хүний эрхийн асуудлаар Кубын эрх баригчидтай санал солилцохоор төлөвлөж байгаа юм байна. Хүний эрхийн асуудал хоёр орны харилцаан дахь эмзэг сэдвийн нэг ч гэлээ, Обамагийн хэлэлцэх хүсэлтэй бүх асуудал, тэдгээрийн дотор хүний эрхийн асуудлаар санал солилцоход бэлэн гэдгээ Кубын Засгийн газар мэдэгдсэн байна. Үүний хариуд Кубын тал 1903 онд хоёр орны байгуулсан гэрээгээр АНУ-ын мэдэлд шилжсэн Гуантанамо Бэйг эргүүлэн Кубын харьяанд шилжүүлэх, мөн Кубын эсрэг АНУ-ын тогтоосон бүх хориг арга хэмжээг цуцлах зэрэг шаардлага тавихаар төлөвлөжээ. 

Обамагийн энэ удаагийн айлчлал хоёр орны харилцааг сайжруулахад том хувь нэмэр болохоос гадна Кубад Америкийн компаниуд бизнес эрхлэх боломжийг нэмэгдүүлэх, мөн тус улсын интернэт хэрэглэгч иргэдийн тоог өсгөх зэргээр Кубад хөгжил дэвшил нэвтрэх үйл явцыг хурдасгана гэж Цагаан ордон найдаж байна. Танд сануулахад, 1959 онд Кубад өрнөсөн хувьсгалаас хойш олон арван жил дайсагнасан харилцаатай байсан хоёр орон нөхөрсөг харилцаагаа сэргээхээр тохирсноо 2014 онд олон улсад анх зарлаж байсан юм.