Өчигдөр Бельгийн нийслэл Брюссель хотноо Европын холбооны гишүүн орнуудын дээд хэмжээний уулзалт эхэллээ. Хоёр өдөр үргэлжлэх тус уулзалтын эхний өдөр Европын холбоонд шинэчлэл хийх Их Британийн дэвшүүлсэн төслийг голлон хэлэлцлээ. Их Британи Европын холбоонд гишүүнчлэлээ хадгалан үлдэхийн тулд тус холбоонд хэд хэдэн чухал бодлогын өөрчлөлт, тэдгээрийн дотор Европын холбооны парламентад улс орнуудын парламентын үүрэг оролцоог нэмэгдүүлэх, гишүүн орнууд хоорондох цагаачдын шилжилт хөдөлгөөнийг бууруулах, Евро бүсэд нэгдээгүй гишүүн орнуудын эдийн засгийн эрх ашиг, өрсөлдөх чадварыг хамгаалахад чиглэсэн шинэчлэл хийх санал тавьсан юм.

Харин Их Британийн тус төсөл өчигдрийн дээд хэмжээний уулзалтын үеэр Европын холбооны бусад гишүүн орноос төдийлөн дэмжлэг авч чадаагүй. Энэ нь Их Британийг Европын холбоонд гишүүн хэвээр авч үлдэх асуудалд холбооны бусад гишүүн орон төдийлөн их ач холбогдол өгөхгүй байгааг харууллаа гэж Их Британийн төлөөлөгчид үзэхэд хүргээд байна. Харин бусад орны дипломатууд дээд хэмжээний уулзалтын эхний өдөр энэ талаар эсэргүүцэл илэрхийлсэн улс байгаагүй учраас өнөөдөр Их Британийн шинэчлэлийн төсөл саадгүй батлагдана гэсэн таамаглал байгаа.

Европын холбооны интеграцичлал цаашид хэрхэх нь өнөөдөр тус холбоонд шинэчлэл хийх Их Британийн төсөл дэмжлэг авах эсэхээс ихээхэн  хамаарна гэдгийг ажиглагчид онцолж байна. Өмнө нь Европын холбооны гишүүнчлэлээсээ татгалзах асуудлаар тус холбооны гишүүн орон бүх нийтийн санал асуулга зохион байгуулж байсан удаагүй. Иймээс ирэх зургаадугаар сард Их Британийн ард түмэн Европын холбооноос гарахын төлөө санал өгсөн нөхцөлд Британийн эдийн засагт томоохон хохирол учруулаад зогсохгүй, Европын холбооны нэр хүндийг унагаж болзошгүй юм.