Төрөл бүрийн амьтан тэжээдэг, амьтдад хайртай хүмүүст зориулсан нэгэн сонирхолтой мэдээллийг хүргэе. Тэжээвэр амьтдын хоол, хувцас хэрэглэл зэрэг хэрэгцээтэй бүхнийг танилцуулдаг үзэсгэлэн яармаг саяхан Хонгконгод болж өндөрлөлөө. Амьтан тэжээх хүмүүс улам бүр олшрох болсон өнөө үед тэжээвэр амьтдад зориулсан бараа бүтээгдэхүүний төрөл ч үүнийг даган нэмэгдэж байгааг энэхүү үзэсгэлэн яармагаас харж болохоор байв.

Хонгконгод тэжээвэр амьтдын тус үзэсгэлэн яармаг жил бүр зохион байгуулагддаг байна. Энэ оны үзэсгэлэнд 150 гаруй компани оролцож, тэжээвэр амьтдын хоол, хувцас хэрэглэл зэрэг уламжлалт бараа бүтээгдэхүүнээс авахуулаад аяллын багц үйлчилгээ, нэмэлт тэжээл, амин дэм зэрэг шинэ содон бараа, үйлчилгээгээ танилцуулжээ.

Тодруулбал, Хятадын компаниуд уламжлалт анагаах ухаандаа суурилсан, амьтдыг өвчин эмгэгээс хамгаалах ургамлын гаралтай бэлдмэлүүдээ үзэсгэлэн яармагт танилцуулсан бол Японы алдарт "SONY" корпораци амьтдад зориулсан зургийн аппарат гаргасан нь энэ удаагийн үзэсгэлэнгийн хамгийн сонирхолтой бүтээгдэхүүнд тооцогдсон байна. Энэ аппаратаар тэжээвэр амьтан өөрийн өнцгөөс орчныхоо, бас эзнийхээ зургийг авах боломжтой гэнэ.

Эдгээр зургаар дамжуулан тэжээвэр амьтад нь ертөнцийг ямар өнцгөөс хардгийг эзэн нь мэдэх ховор завшаан тохионо гэж "SONY" корпорацийнхан тайлбарлажээ. Мөн аяллын зарим агентлаг амьтдад зориулсан аяллын үйлчилгээ санал болгосон байна.

Хонгконгийн нийт айл өрхийн 10 хувь нь амьтан тэжээдэг. 2011 онд л гэхэд Хонгконгод айл өрхүүд нийтдээ 257 мянга 500 нохой, 167 мянга 600 муур тэжээж байжээ. Тэжээвэр амьтдад зориулсан бараа бүтээгдэхүүний үзэсгэлэн яармаг өнгөрсөн баасан гарагт эхлэн, өчигдрийг дуустал үргэлжилсэн юм.