Монгол нүүдэлчин ард түмний соёл уламжлалыг харуулсан говь нутгийнхны тэмээний баярын талаар "Ассошиэйтед Пресс" агентлаг юу гэж мэдээлснийг та бүхэнд хүргэхээр бэлтгэлээ. Баянхонгор аймаг 14 дэх жилдээ тэмээний баярыг зохион байгуулсан. Энэ наадамд 1000 гаруй малчин, 300 гаруй тэмээтэйгээ хүрэлцэн ирж, оролцсон юм. Монголын говь нутагт тархсан хоёр бөхт тэмээний тоо толгой жил ирэх бүр буурч байгаа. Иймд Баянхонгорын тэмээний баярыг зохион байгуулагч “Говийн сэргэлт” сангийнхан говийн ард түмний амьдрах орчинг сайжруулах, усны нөөц, зэрлэг байгалийг хамгаалах замаар нүүдэлчдийн соёлыг хадгалан авч үлдэхэд чиглэсэн үйл ажиллагаа явуулж байгаа талаар "Ассошиэйтед Пресс" агентлаг мэдээндээ онцолсон байна.

Манай улсад 40 жилийн өмнө 800 мянга гаруй тэмээ байсан бол сүүлийн жилүүдэд энэ тоо 4 дахин хорогдож, 200 мянгад хүрсэн юм. Иймээс тус сангийнхан хоёр бөхт тэмээг устаж үгүй болохоос сэргийлэх, тоо толгойг нь эргүүлэн өсгөхөд чиглэсэн олон алхам хэрэгжүүлж эхэлсэн байна. 13 жил тэмээний баяр зохион байгуулсны дараа энэ жил Баянхонгор аймаг дахь тэмээний тоо толгой хоёр дахин өсчээ.

Тэмээний баяр нь тэмээний уралдаан, мөн сайхан тэмээтэй ганган хосыг тодруулах тэмцээн гэсэн хоёр хэсгээс бүрддэг байна. Монголын өргөн уудам нутагт бие биенээсээ алс тархан суудаг нүүдэлчид тэмээний энэ баяраар айл саахалтынхантайгаа уулзан баярлах боломж тохиодог гэж "Ассошиэйтед Пресс" агентлаг мэдээлээ. Суурин иргэншилд шахагдан, олон оронд мөхөж байгаа нүүдэлчин ёс заншил Монголын хөдөө талд хэрхэн хадгалагдаж байгаа талаар мөн Монголд аялснаар энэ гайхамшигт өв уламжлалтай танилцах ховор боломж олдоно гэдгийг өнгөрсөн долоо хоногт "Ассошиэйтед Пресс"-ээс гадна олон улсын өөр хэд хэдэн хэвлэлд онцлон мэдээлсэн юм.