Сирид гал зогсоох түр гэрээний нөхцөлүүдийг ОХУ-ын гадаад хэргийн сайд Сергей Лавров, АНУ-ын төрийн нарийн бичгийн дарга Жон Керри нар хэлэлцэн тохиролцжээ. Ингэснээр Сирид гал зогсоох боломж урьд өмнө байгаагүйгээр нэмэгдсэн талаар өчигдөр Жон Керри мэдэгдлээ.

Тэрээр Йорданы гадаад хэргийн сайдтай уулзсаны дараа зохион байгуулсан хэвлэлийн бага хурлынхаа үеэр ойрын өдрүүдэд гал зогсоох хэлэлцээр хэрэгжиж эхлэх боломж байгааг сэтгүүлчдэд зарлалаа. Гэхдээ талууд санал зөрүүтэй зарим асуудал байгааг Керри нуусангүй. Эдгээр асуудлаар нэгдсэн тохиролцоонд хүрч, хэлэлцээрийн нөхцөлүүдийг бүрэн шийдэхээр талууд яриа хэлэлцээг үргэлжлүүлж байгаа юм байна.

Энэ хооронд Сирид халдлага дайралт үргэлжилсэн хэвээр байна. Өчигдөр Сирийн нийслэл Дамаск хотын өмнөд дүүрэгт дараалан хэд хэдэн дэлбэрэлт болж, 87 хүн амь үрэгдсэн талаар Их Британид төвтэй Сири дэх хүний эрхийн ажиглагч байгууллага мэдээлэв.

Үүнээс гадна Сирийн баруун хэсэгт орших Хомс хотод тэсрэх бөмбөг суурилуулсан хоёр автомашин дэлбэрч, 59 хүний амь нас хохирчээ. Алан хядагчид гал намжсан үеийг ашиглан давшилт эхлэхгүй байх, мөн Ассадыг эсэргүүцэгч сөрөг хүчний босогчдод гадны орнууд тусламж дэмжлэг үзүүлж байгаагаа зогсоох зэрэг нөхцөлийг хангах тохиолдолд Сирийн ерөнхийлөгч Башар Асад гал зогсоох хэлэлцээрт нэгдэхэд бэлэн гэдгээ илэрхийлсэн. Харин тус улсын сөрөг хүчний бүлэглэлүүд Дамаскийн холбоотон орнууд, тэр дундаа Орос агаарын цэргийн ажиллагаагаа зогсоох, хот тосгодыг бүслэлтээс чөлөөлөх, Сирийн нутаг дэвсгэр даяар хүмүүнлэгийн тусламжийн цуваа хүрэх боломжоор хангах зэрэг нөхцөлийг биелүүлсэн тохиолдолд энэ хэлэлцээрт мөн нэгдэхээр зөвшөөрчээ.

Ирэх өдрүүдэд энэ асуудлаар Орос, Америкийн ерөнхийлөгчид утсаар ярьж, түр хэлэлцээрийн нөхцөлүүдийг эцэслэн тохиролцож магадгүйг Жон Керри мэдэгджээ. Сирийн засгийн газрын цэрэг, сөрөг хүчний босогчид хооронд гал зогсоосон ч, алан хядагч бүлэглэлүүдийн эсрэг ажиллагаа өмнөх хэвээр үргэлжлэх юм байна.