БНАСАУ энхийн гэрээ байгуулах талаар хэлэлцээ хийх санал тавьсан ч АНУ энэ саналыг хүлээж аваагүй байна. Умард Солонгос тус гэрээнд Солонгосын хойгийг цөмийн зэвсгээс ангижруулах талаар тусгах төлөвлөгөөгүй байсан учраас ийнхүү Умардын саналаас татгалзсан гэж АНУ-ын Төрийн департамент өчигдөр мэдэгдлээ.

Үүний өмнө АНУ-ын “Уолл-стрит Жорнел” сонинд Америкийн холбогдох албаны хүний яриаг иш татан, Обамагийн засаг захиргаа Пхеньянтай энхийн гэрээ байгуулах талаар нууц хэлэлцээ хийсэн гэж мэдээлсэн юм. АНУ энхийн хэлэлцээ эхлүүлэхээс өмнө Умард Солонгос цөмийн хөтөлбөрөө бүрэн зогсоох ёстой гэсэн хатуу байр сууриа орхиж, харин цөмийн хөтөлбөрийн асуудлыг хэлэлцээний явцад хөндөх нэг асуудал болгон, буулт хийсэн. Харин Умард Солонгос Америкийн эрх баригчдын энэ саналаас татгалзан, өнгөрсөн нэгдүгээр сарын 6-нд цөмийн дахин нэг туршилт явуулсан гэж Уолл-Стрийт сонины нийтлэлд бичжээ.

Харин АНУ-ын Төрийн департамент тус сонины мэдээг эрс няцааж, Умард Солонгосын тал энхийн хэлэлцээ хийх саналыг эхлэн тавьсан гэх тайлбарыг өчигдөр хийлээ. АНУ энэ хэлэлцээнд Умардын цөмийн хөтөлбөрийн асуудлыг багтаах шаардлага тавьсныг Умард Солонгос хүлээн аваагүй гэж Төрийн департаментын хэвлэлийн төлөөлөгч бичгэн мэдэгдэлдээ дурдсан байна.

Та бүхэнд эргэн сануулахад, 1950 онд эхэлсэн Солонгосын хойгийн дайныг 1953 онд гал зогсоох хэлэлцээр байгуулснаар эцэслэсэн байдаг юм. Умард Солонгос, Хятад, мөн НҮБ-ын хүчнийг төлөөлөн АНУ-ын талууд гарын үсэг зурсан тус хэлэлцээрээр хоёр Солонгосын байлдааны фронт тулж ирээд байсан 38 дугаар өргөргөөр зааглан цэрэггүй бүс байгуулсан юм. Хагас зууны өмнөх дайныг бүрэн эцэслэж, энхийн гэрээ байгуулахаар Умард Солонгосын тал санал тавьсан нь энэ юм байна.