Их Британийн нийслэл Лондон хотын захирагч Борис Жонсон улс нь Европын холбооны гишүүнчлэлээс татгалзах нь зүйтэй гэж үзэж байгаагаа илэрхийллээ. Тэрээр өнгөрсөн баасан гарагт Европын холбооны гишүүн орнуудын дээд хэмжээний уулзалтын үеэр баталсан шинэчлэлийн гэрээнд тус холбоонд хийх гол шинэчлэлийн саналуудыг тусгаагүй гэж үзэж байна.

Иймээс Их Британийн Ерөнхий сайд Дэвид Кэмероны нам нэгд хамтран зүтгэгч, 2008 оноос хойш Лондон хотын захирагчаар ажиллаж байгаа Борис Жонсон Европын холбооны гишүүнчлэлээс татгалзах санал өгнө гэдгээ өчигдөр мэдэгдсэн байна. Энэ мэдэгдэл Их Британийн эрх баригч Консерватив намын доторх хагарлыг гүнзгийрүүлсэн хэрэг болж байна. Жонсон Их Британийг Европын холбооноос гаргах аянд нэгдсэнээр ирэх зургаадугаар сарын 23-нд Европын холбоонд үлдэхийн төлөө санал өгөх хүмүүсийн тоо улам буурах хандлагатай байна.

Жонсоны мэдэгдлийн дараа Их Британийг Европын холбооны гишүүнчлэлээс татгалзах хэрэгтэй гэж үзэх хүмүүсийн хувь хэмжээ 29-33 хувьд хүрч өсчээ. Мөн Их Британи Европын холбооноос гарч магадгүй гэх болгоомжлолоос үүдэн Азийн зах зээлд Их Британийн үндэсний мөнгөн тэмдэгт фунт стерлингийн ханш 1 хувиар уналаа. Дэвид Кэмерон 2020 оноос өмнө Ерөнхий сайдын бүрэн эрхээ хүлээлгэн өгөхөөр төлөвлөж байгаагаа өмнө нь мэдэгдсэн юм. Харин Лондоны захирагч Борис Жонсон Кэмероны халааг авч, Их Британийн дараагийн Ерөнхий сайдаар сонгогдох өндөр магадлалтай нэр дэвшигчид тооцогдож байгаа юм.

Тэрээр ийнхүү Дэвид Кэмероны баримталж байгаа байр суурийг эрс эсэргүүцэн, Европын холбооны гишүүнчлэлээсээ Их Британи татгалзах нь зүйтэй гэж мэдэгдсэн нь томоохон эрсдэл дагуулсан алхам гэж шинжээчид үзэж байна. Учир нь Их Британийн ард түмэн Европын холбоонд гишүүн хэвээр үлдэхээр шийдвэл Жонсон Ерөнхий сайдаар сонгогдох магадлал эрс буурах юм. Харин байдал эсрэгээр эргэсэн нөхцөлд Жонсон Ерөнхий сайдаар сонгогдох хамгийн өндөр магадлалтай хүн хэвээр үлдэх төлөвтэй байна.