Өчигдөр Македон улсын эрх баригчид дүрвэгчдийн талаар баримталж байгаа бодлогоо дахин чангатгаж, Гректэй залгаа хилээрээ афган дүрвэгчдийг нэвтрүүлэхгүй байх шийдвэр гаргажээ. Грекийн Цагдаагийн газрын өгсөн мэдээллээр Македоны хил залгаа Серби улс афган дүрвэгчдийг хилээрээ оруулахгүй байх шийдвэрийг анхлан гаргасан байна. Үүнээс үүдэлтэйгээр нутаг дэвсгэрт нь афган дүрвэгчид бөөгнөрөхөөс болгоомжлон, Македоны эрх баригчид Сербитэй адил арга хэмжээ хэрэгжүүлэхээр болжээ.

Энэ шийдвэрээс үүдэлтэйгээр Грекийн Македонтой залгаа хилийн ойролцоо гацсан цагаач дүрвэгчдийн тоо улам бүр нэмэгдэж, бага үд гэхэд 1000 гаруйд хүрсэн байна. Мөн хилээс 17 км зайтай шатахуун түгээгүүрийн хажууд 4000 гаруй цагаач дүрвэгчийг тээвэрлэсэн 80 автобус зогсож байгаа юм. Энэ мэдээллийг үл харгалзан Македоны хилийг зорих цагаач дүрвэгчдийн цуваа тасрахгүй хэвээр байна. Өчигдөр олон орны 500 орчим цагаач дүрвэгч шатахуун түгээгүүрээс хил рүү явган хүрч очжээ. Харин Македоны холбогдох албаныхан хилээрээ зөвхөн Ирак, Сирийн иргэншилтэй, үүнийгээ нотлох бичиг баримттай 150 орчим дүрвэгчийг нэвтрүүлсэн байна.

2015 онд нэг сая гаруй цагаач дүрвэгч хүлээн авсныхаа дараа Европын холбооны улсууд цагаач дүрвэгчдийн урсгалыг сааруулахын тулд олон арга алхам хэрэгжүүлж эхлээд байгаа юм. Тухайлбал, Шенгений гадаад хилийг бүрдүүлдэг улс орнууд дүрвэгчдийн урсгалыг хянахад хамтран ажиллахаар тохиролцсон байна. Өчигдрийн байдлаар 617 афган дүрвэгч Македоны Сербитэй залгаа хилээр нэвтэрч чадалгүй, хүлээж байна. Сербийн эрх баригчид афган дүрвэгчдийг хүлээн авахаас татгалзсан шалтгаанаа харин Австри, Словенийн эрх баригчид дүрэм журамдаа өөрчлөлт оруулсантай холбон тайлбарлаж байгаа юм.