Сирид дайтагч талуудын гал зогсоох түр хэлэлцээр энэ сарын 27-ны шөнө дундаас эхлэн хүчин төгөлдөр хэрэгжихээр болсныг АНУ, ОХУ-ын эрх баригчид мэдэгдэж байна. Гэхдээ энэхүү гал зогсоох хэлэлцээрийн хүрээнд Аль-Каида бүлэглэлтэй холбоотой үйл ажиллагаа явуулдаг Аль-Нусра, мөн "Исламын улс" зэрэг алан хядагч бүлэглэлүүдийн эсрэг цэргийн ажиллагаа үргэлжилсэн хэвээр байх юм.

Энэ сарын 12-нд дэлхийн их гүрнүүд хуралдан, долоо хоногийн дотор Сирийн нутаг дэвсгэрт гал зогсоохоор тохиролцсон юм. Гэхдээ тохиролцоо заасан хугацаандаа хэрэгжиж эхлээгүй учраас АНУ, ОХУ-ын зарласан шинэ товын дагуу гал зогсоох хэлэлцээр хүчин төгөлдөр үйлчилж эхлэх эсэх дээр зарим ажиглагч эргэлзсэн байр суурьтай байна.

Өнгөрсөн ням гарагт Сирийн нийслэл Дамаск, мөн тус улсын баруун хэсэгт оршдог Хомс хотуудад алан хядагчид халдлага үйлдэж, энэ үеэр 140 гаруй хүн амь үрэгдсэн юм. 2011 оны гуравдугаар сараас хойш үргэлжилж байгаа Сирийн иргэний дайнд нийтдээ 250 мянга гаруй энгийн иргэний амь хохирсон гэх тооцоо байгаа юм.

Мөн 11 сая хүн орон гэрээсээ дайжихаас аргагүйд хүрч, дөрвөн сая хүн эх орноосоо дүрвэсэн байна. Ийнхүү тав дахь жилдээ үргэлжилж байгаа Сирийн хямралыг эцэслэхийн тулд АНУ-ын Ерөнхийлөгч Барак Обама ОХУ-ын Ерөнхийлөгч Владимир Путин руу утас цохиж, гал зогсоох хэлэлцээрийг хэрэгжүүлэх асуудлаар яриа хийжээ. Энэ утасны ярианы дараа Сирид гал зогсоох тухай хоёр орон хамтарсан мэдэгдэл гаргасан байна.

Тус мэдэгдэлд зааснаар Сирийн хямралд татагдан оролцож байгаа гал зогсоох гэрээний нөхцөлийг зөвшөөрсөн талуудад энэ гэрээ үйлчлэх юм байна. Харин НҮБ-аас алан хядагч байгууллага гэж тодорхойлсон бүлэглэлүүдийн эсрэг АНУ тэргүүтэй эвсэл болон ОХУ-ын агаарын цэргийн ажиллагаа үргэлжлэх юм байна. Гэрээнд нэгдэх хүсэлтэй сөрөг хүчний босогчдын бүлгүүд энэ баасан гарагийн үд дунд гэхэд энэ хүсэлтээ албан ёсоор баталгаажуулах ёстой юм байна.