Энэтхэгийн нийслэл Шинэ Дели хотын цэвэр усны хэрэгцээг хангадаг гол дамжуулах сувгийг жагсагчид эвдэн сүйтгэснээс үүдэн тус хотын 10 сая иргэн ундны усгүй болжээ. Энэтхэгийн хойд бүс нутгаар голлон суурьшсан Жат угсаатны иргэд өөрсдөд нь зориулан төрийн албанд болон боловсролын салбарт ажил эрхлэх квот тогтоохыг шаардан, жагсаал эхлүүлсэн юм.

Гурав хоног үргэлжилсэн тус жагсаалын үеэр үймээн самуун гаарч, цагдаа нар болон жагсагчдын хоорондох мөргөлдөөнд одоогоор 16 хүн амь үрэгдэж, олон зуун хүн гэмтэж шархадсан мэдээ байна. Жат угсаатны жагсагчдын эвдэн сүйтгэсэн Мунакийн ус дамжуулах суваг нь Дели хотын 16 сая оршин суугчийн 60 гаруй хувийнх нь цэвэр усны хэрэгцээг дангаар хангадаг юм.

Энэтхэгийн Засгийн газрын цэргүүд ус дамжуулах сувгийг жагсагчдаас чөлөөлсөн. Гэхдээ эвдрэл гэмтлийг бүрэн засч, эргэн хэвийн горимоор ус түгээж эхлэхэд 3-4 хоног шаардлагатайг холбогдох албаныхан мэдээлж байна.

Ийнхүү ус дамжуулах том сувагт эвдрэл гарснаас үүдэн Дели хот цэвэр усны гачигдалд нэрвэгдлээ. Үүнтэй холбогдуулан тус хотын дунд сургуулиуд үйл ажиллагаагаа түр хугацаагаар зогсоосон байна. Ус дамжуулах сувгийг сүйтгэх гэж байгаа тухай мэдээ шуурхай ирсний ачаар хотын иргэд чадах чинээгээрээ цэвэр ус нөөцөлсөн талаар Дели хотын захирагч мэдээлж байна.

Гэхдээ хуримтлуулсан усаараа айл өрхүүд дахин гурав хоногийн хэрэгцээгээ хангаж хүрэлцэхээргүй байгаа юм. Иймээс Дели хотын эрх баригчид ус зөөвөрлөх автомашинууд дайчлан, хотын иргэдийн цэвэр усны хэрэгцээг хангахаар ажиллаж эхлээд байна.