Нэгдсэн Үндэсний Байгууллага цөмийн зэвсгийг хуулиар хориглох боломжийг судлах ажлын хэсэг байгуулжээ. Өнгөрсөн 12 дугаар сард энэ асуудлаар ажлын хэсэг байгуулах саналыг НҮБ-ын Ерөнхий Ассамблей хэлэлцэн, дэмжсэн юм. Өчигдөр тус ажлын хэсгийн таван өдрийн уулзалт Швейцарийн Женев хотноо эхэлсэн байна.

Энэ уулзалтад 90 гаруй орны төлөөлөгч оролцож байгаа ч цөмийн зэвсэг эзэмшдэг гүрнүүд төлөөллөө илгээгээгүйг олон улсын хэвлэлүүд онцолж байна. Тус уулзалтад оролцож байгаа НҮБ-ын Ерөнхий нарийн бичгийн дарга асан Кофи Аннан цөмийн зэвсгийн дэлгэрэлт сүүлийн жилүүдэд дэлхий нийтэд улам бүр тулгамдсан асуудал болсныг онцлон тэмдэглэсэн талаар Японы Эн-Эйч-Кей суваг уламжлав. Түүний үзэж байгаагаар “Цөмийн зэвсэг үл дэлгэрүүлэх гэрээ” 45 жилийн өмнө хүчин төгөлдөр үйлчилж эхэлснээс хойш цөмийн зэвсэг хураах ажилд төдийлөн ахиц гараагүй.

Үүний улмаас сүүлийн жилүүдэд цөмийн цэнэгт толгойг дэлхий даяар тархаан байршуулах болсон, мөн их гүрнүүд цөмийн зэвсгийн хүчин чадавхиа нэмэгдүүлж, зэр зэвсгээ тогтмол шинэчилж байгаа талаар Кофи Аннан ажлын хэсгийн уулзалтын эхэнд ярьжээ. НҮБ-ын цөмийн зэвсгийн асуудлаарх шинэ ажлын хэсэг цөмийн зэвсгийг цөөрүүлэх асуудлаар ахиц дэвшил гаргана гэж Кофи Аннан найдаж байна. Ажлын хэсгийн таван өдрийн уулзалт баасан гарагт өндөрлөсний дараа ирэх наймдугаар сар хүртэл дахин хоёр удаа уулзалт зохион байгуулах төлөвлөгөөтэй байна.

Эдгээр уулзалтын эцэст тус ажлын хэсэг цөмийн зэвсгийг хуулиар хориглох боломж бололцооны тухай тайлангаа есдүгээр сард НҮБ-ын Ерөнхий Ассамблейд өргөн барих аж.