Энэ сард АНУ-ын иргэд африк гаралтай алдар нэртэй хүмүүс, тэдний оролцсон түүхэн чухал үйл явдлуудыг нэхэн дурсдаг “Хар арьстнуудын түүхийн сар”-аа тэмдэглэн өнгөрүүлж байна.

Энэ тэмдэглэлт сарыг тохиолдуулан өнгөрсөн долоо хоногт АНУ-ын Ерөнхийлөгч Барак Обама гэргий Мишель Обамагийн хамтаар "Цагаан ордон"-д хүлээн авалт зохион байгуулжээ. Харин тус хүлээн авалтад оролцсон 106 настай буурай Барак Обаматай уулзаад хөл газар хүрэхгүй баярлаж байгаа дүрс бичлэг олон нийтийн цахим хуудсуудаар тарж, интернэт мэдээний нэгэн гол сэдэв болоод байгааг бид өмнө нь мэдээлсэн.

1909 онд Өмнөд Каролина муж улсад төрсөн өндөр настан МкЛорин нэг зууны насыг элээхдээ олон Ерөнхийлөгч ээлж халаагаа авахыг үзжээ. Харин хар арьстнууд ялгаварлан гадуурхалтад өртөн, эрхээ зөрчүүлсээр байсан цаг үед төрсөн түүний хувьд 2008 оны сонгуульд АНУ-ын Ерөнхийлөгчөөр анх удаа хар арьст хүн сонгогдсон явдал тун их баяр хөөр авчирсан байна.

Тэрээр Америкийн анхны хар арьст Ерөнхийлөгч Барак Обаматай уулзах хүсэлтээ илэрхийлэн, "Цагаан ордон"-д 1 жил гаруйн турш өргөдөл илгээсэн аж. Түүний цахим өргөдөлд олон мянган хүн дэмжлэг илэрхийлэн гарын үсэг зурсны ачаар МкЛорен "Цагаан ордон"-ы хүндэтгэлийн хүлээн авалтад оролцож, Ерөнхийлөгч Обаматай уулзах боломж олдсон байна. Өндөр настан МкЛорен Ерөнхийлөгч Барак Обама болон тэргүүн хатагтай Мишель Обаматай уулзах үедээ тун их баярлаж, энэ баяр хөөрөө илэрхийлэн бүжиглэсэн бичлэг олон нийтийн цахим хуудсаар түгсэн хэвээр байна.

Цахим ертөнцөд 106 настай МкЛорены цуцашгүй их эрч хүч, баяр хөөрийг шагшин магтаж байгаа юм. Түүний бичлэг олон нийтийн сүлжээнд тархсанаас хойш хайрлаж хүндэтгэж байгаагаа илэрхийлэх гэсэн хүмүүсээс үүдэн МкЛорены гэрийн утас өдөр, шөнөгүй хангинах болжээ.

"Ассошиэйтед Пресс" агентлагт өгсөн ярилцлагадаа Виржиниа МкЛорен Барак Обаматай уулзсан нь өөрийнх нь амьдралд тохиосон хамгийн гайхамшигтай үйл явдал гэж ярьсан байна.