
Испанийн Барселона хотод зохиогдож буй гар утасны олон улсын үзэсгэлэн яармаг дээр Өмнөд Солонгосын “LG” корпорацийн хувьд “G5” ухаалаг гар утсаа танилцуулсан байна. Жил ирэх бүр загвар үзэмж сайтай гар утаснууд батерей нь салдаггүй болж хувьсан өөрчлөгдөж байгаа. Ингэснээр утасны батерей муудвал заавал шинэ утас худалдан авах шаардлага тулгарч байна. Харин “LG” корпораци энэ хандлагыг халж, “G5” гар утсаа салдаг батерейтайгаар үйлдвэрлэжээ.
Мөн “G5” гар утасны камер нь 16 мегапиксел нягтаршилтай, 135 градусын өргөн өнцөгтэй болсон байна. Өөрөөр хэлбэл, гар утсаа ашиглан илүү их талбайг өндөр нягтаршилтайгаар гэрэл зурагт буулгах боломж бүрдэж байна гэсэн үг юм. “G5” гар утасны урд камер мөн өргөн өнцөгтэй. Ингэснээр селфи зураг авахад илүү олон хүнийг багтаах боломж бүрджээ.
“LG” корпораци энэхүү ухаалаг гар утаснаасаа гадна мөн өөрийн баяжуулсан бодит байдлын нүдний шилийг танилцуулсан. 360 градусаас дүрс бичлэгийг илүү бодитоор үзэх технологи улам бүр дэлгэрч байгааг "Samsung", "LG" корпорацийн танилцуулсан эдгээр бүтээгдэхүүн илэрхий харуулж байна.
Мөн “LG” гэр манах үүрэгтэй “Роллин Бот” нэртэй роботоо Барселоны үзэсгэлэн яармагт танилцууллаа. Бөмбөг шиг харагдах энэ роботыг утасгүй интернэтийн технологи ашиглан алсаас гар утсаараа удирдан, зураг авах, дүрс бичлэг хийх боломжтой юм байна. Орон гэр тань аюулгүй, амгалан байгаа эсэхийг тогтмол мэдээлэх энэ робот бас тэжээвэр амьтныг харж хандах, хамт тоглох, эзнийх нь дуу хоолойг сонсгох чадвартай. “Роллин Бот” роботыг мөн өрөөний гэрэлтүүлэг, телевиз болон бусад төхөөрөмжийг тохируулах, асааж, унтраах алсын удирдлага болгон ашиглах боломжтой юм.
"LG" корпораци өргөн өнцөгтэй камер бүхий ухаалаг гар утсаа танилцууллаа | ||
Үзсэн: 1224 | Mongolian National Broadcaster |
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.