2011 онд Японы "Фукушима Дайичи" атомын цахилгаан станцад осол гарсны дараа тус станцын реакторын цөм хайлж дэлбэрэн, агаар мандалд их хэмжээний цацраг идэвхт бодис тархсан. Энэ тухай олон нийтэд шуурхай зарлалгүй цаг алдсан гэдгээ тус цөмийн цахилгаан станцыг хариуцан ажиллуулж байсан Токиогийн цахилгаан эрчим хүчний компани "ТЕПКО" хүлээн зөвшөөрчээ.

Шинжээчдийн үзэж байгаагаар Фукушима атомын цахилгаан станц цунамигийн давалгаанд цохигдсоноос хэдхэн цагийн дараа тус станц дахь реакторын цөм хайлж эхэлсэн байна. Харин "ТЕПКО" ослоос хойш хоёр сарын турш энэ тухай мэдээллийг эрс няцаасаар байсан юм. Тус компанийн дотоод журамд зааснаар реакторын цөмийн 5-аас дээш хувь хайлсан тохиолдолд олон нийтэд цаг алдалгүй зарлах ёстой байдаг байна. Энэ журам яагаад мөрдөгдөөгүй болохыг тус компанийн удирдлага мөрдлөг шалгалт явуулан тогтоохоор төлөвлөж байна.

Эргэн сануулахад, Фукушима атомын цахилгаан станц цунамигийн давалгаанд автсаны дараа эрчим хүч тасран, реакторын цөмийг хөргөх боломжгүй болсны улмаас цөм аажмаар хайлж, дэлбэрэлт үүссэн юм. Тус ослыг 1986 онд Чернобыль хотын атомын цахилгаан станцад болсон ослоос хойших хамгийн том цөмийн гамшигт тооцож байна. Фукушима атомын цахилгаан станцад осол гарсны дараа тус бүс нутгаас 160 орчим мянган хүнийг нүүлгэн шилжүүлсэн. Эдгээр оршин суугчийн олонх нь цацраг идэвхт бодисын бохирдол өндөр хэвээр байгаатай холбогдуулан орон гэртээ буцах боломжгүй байгаа юм.