Өнгөрсөн оны аравдугаар сард ОХУ-ын “КогалымАвиа” нисэх компанийн А321 онгоц Синайн хойгт сүйрсэн нь алан хядагчдын буруугаас үүдэлтэй болохыг Египетийн Ерөнхийлөгч Абдул Фаттах аль-Сиси анх удаа албан ёсоор хүлээн зөвшөөрчээ. Алан хядагчид Оросын нисэх онгоцыг сүйрүүлсэн нь Египетийн аялал жуулчлалын салбарыг уналтад оруулах, Орос, Египет хоёр орны харилцааг муутгах зорилготой байсан гэж тэрээр мэдэгдсэн байна.

Өмнө нь ОХУ-ын шинжээчид Синайн хойгт сүйрсэн тус нисэх онгоцны сэгт шинжилгээ хийж, 224 хүн амь үрэгдсэн энэ сүйрлийн гол шалтгаан нь нисэх онгоцонд тэсрэх бөмбөг суурилуулснаас үүдэлтэй гэх дүгнэлт гаргасан юм. Мөн "Исламын улс" алан хядагч бүлэглэл халдлагын хариуцлагыг өөртөө хүлээж, А321 онгоцонд байрлуулсан гэх тэсрэх бөмбөгний зургийг цахим сүлжээнд байрлуулж шуугиан тарьж байсан. Харин Египетийн эрх баригчид Оросын талын дүгнэлтийг хүлээн зөвшөөрөлгүй, өөрсдийнх нь томилсон шинжээчид А321 онгоцны сүйрэлд алан хядагчдын оролцоо байсан гэх ул мөр илрүүлээгүй гэж мэдэгдсээр өнөөг хүрчээ.

Эргэн сануулахад, Синайн хойгт сүйрсэн Оросын А321 онгоц Египетийн аялал жуулчлалын гол бүс Шарм эл Шейх хотын нисэх буудлаас Санкт Петербургийн чиглэлд нислэг үйлдэж байсан юм. Тус онгоцыг алан хядагчид сүйрүүлсэн гэдгийг Египетийн Ерөнхийлөгч сая албан ёсоор хүлээн зөвшөөрөхдөө халдлагыг аль алан хядагч бүлэглэл үйлдсэн гэж үзэж буйгаа тодруулаагүй байна. Оросын нисэх онгоцны сүйрлээс хойш Египетийн аялал жуулчлалын салбарын ашиг орлого эрс буурсан. Египетийн ДНБ-ий 13 хувийг аялал жуулчлалын салбар бүрдүүлж, нийт ажлын байрны 12 хувийг шууд болон шууд бусаар хангадаг гэх тооцоо байдаг юм.