Австрали улс ирэх 10 жилийн хугацаанд батлан хамгаалах салбарын төсвөө 30 тэрбум америк доллараар нэмэгдүүлэхээр төлөвлөж байна. Энэ нь бүс нутгийн аюулгүй байдлын орчин нөхцөл өөрчлөгдөж байгаа, тэр дундаа Хятад өөрийн усан хилээ тэлэх болсонтой холбоотой гэж тус улс тайлбарлаж байна. Австралийн Ерөнхий сайд Малкольм Тернбулл өчигдөр Батлан хамгаалах салбарынхаа 2016 оны бодлогын баримт бичгийг танилцуулсан юм.

Энэ баримт бичигт Австралийн хөгжил цэцэглэлт Энэтхэг, Номхон далайн бүс нутгийн энх тайван, тогтвортой байдлаас ихээхэн хамаарна гэж тусгажээ. Мөн Өмнөд Хятадын тэнгисийн бүс нутагт Хятад улс хиймэл арал байгуулах ажлаа эрчимжүүлж, мөн энэ ажлынхаа цар хүрээг өргөжүүлж байгаа нь Австралийн Засгийн газрын сэтгэл зовоосон асуудал болохыг тус баримт бичигт мөн онцолсон байна.

Эдгээр хиймэл арлыг цэрэг, батлан хамгаалахын зорилгоор ашиглахыг Австрали улс эсэргүүцсэн байр суурьтай байгаа юм. Харин Австрали олон улсын дэглэмтэй бүс нутаг дахь навигацийн эрхээ хангах зорилгоор АНУ-ын адилаар Өмнөд Хятадын тэнгисийн бүс нутагт байлдааны хөлөг онгоцоо илгээх эсэх тухай сэтгүүлчийн асуултад Ерөнхий сайд Тернбулл хариулахаас татгалзсан байна. Цаашид Австрали батлан хамгаалахын хүчин чадлаа нэмэгдүүлэхийн тулд шумбагч онгоцныхоо тоог 6-12 болгон өсгөхөөр төлөвлөж буй юм байна. Хамгийн эхний шинэ шумбагч онгоц 2030-аад онд ашиглалтад орох юм.