Сирийн нутаг дэвсгэрт гал зогсоосноос хойш хоёр хоног өнгөрч байна. Өчигдөр гал зогсоох хэлэлцээрийн хэрэгжилтийг хянах зорилгоор АНУ, ОХУ хамтран Сирийн баруун хойд хэсэг дэх Латакия боомт хот болон Йордан улсын нийслэл Амман хотод НҮБ-ын ажиглах цэгүүд шинээр байгуулсан байна.

Эдгээр цэгээс НҮБ 24 цагийн турш гал зогсоох хэлэлцээрийн хэрэгжилтийг хянаж байгаа юм. Баасан гарагийн шөнө дундаас эхлэн гал зогсоох хэлэлцээр хэрэгжиж эхэлсэн ч Сирийн зарим хэсэгт багахан хэмжээтэй зэвсэгт мөргөлдөөн гарч, агаарын цохилтууд үргэлжилсэн хэвээр байна гэж зарим агентлаг мэдээлж байна. Эдгээр жижиг зөрчил мөргөлдөөн хурцдаж, гал зогсоох хэлэлцээрийн хэрэгжилтэд саад учруулах вий гэж шинжээчид болгоомжилж байгаа юм. Их Британид төвтэй Сири дэх хүний эрхийн ажиглагч байгууллагын мэдээгээр Сирийн Ерөнхийлөгч Башар Асадад үнэнч цэргүүд Хомс хотод агаарын цэргийн ажиллагаа явуулсан байж болзошгүй байна. Мөн Сирийн хойд хэсэг дэх Алеппо хот, мөн төв хэсэг дэх Хама хотод аль талд харьяалагдах нь үл мэдэгдэх байлдааны онгоц агаарын цохилт хийсэн гэж тус байгууллага мэдээллээ.

Гал зогсоох хэлэлцээр хэрэгжих хугацаанд талууд алан хядагч бүлэглэлүүдийн эсрэг цэргийн ажиллагаагаа үргэлжлүүлэхээр тохиролцсон юм. Сирийн Засгийн газрын цэргүүд Хама хотод явуулж байгаа цэргийн ажиллагаагаа алан хядагчидтай тэмцэх зорилготой гэж тайлбарлаж байна. “Эн-Эйч-Кей телевизэд” Сирийн босогчдын бүлэглэлтэй ойрын эх сурвалжууд утсаар мэдээлэл өгсөн байна. Энэ мэдээллээс үзэхэд өнгөрсөн ням гарагт Алеппо хотын ойролцоо бүс нутагт гал зогсоох хэлэлцээрийг талууд зөрчсөн зургаан тохиолдол бүртгэгджээ. Гэхдээ эдгээр сөргөлдөөний үеэр хэдэн хүний амь хохирсон болон бусад мэдээлэл одоогоор тодорхойгүй байна гэж “Эн-Эйч-Кей” мэдээллээ.