Япон дахь АНУ-ын агаарын цэргийн Футенма баазыг нүүлгэх талаар тус улсын Засгийн газар болон Окинава мужийн захиргааны хооронд гарсан маргаан таслагдаагүй хэвээр байна. Окинава арлын хүн ам шигүү суурьшсан бүсэд оршдог Футенма баазыг арлын эрэгтэй ойролцоо, хүн ам багатай бүсэд нүүлгэх ажилд олгосон газрын зөвшөөрлийг Окинава мужийн шинэ захирагч цуцласнаар маргаан дэгдээд байгаа юм.

Өчигдөр Японы Ерөнхий сайд Шинзо Абэ шүүхээр маргааныг хэлэлцэж байгааг үл харгалзан, Америкийн агаарын цэргийн баазыг нүүлгэн байгуулахад Окинава мужийн эрх баригчдаас дэмжлэг авах хүсэлтэй хэвээр байх болно гэдгээ илэрхийлсэн байна. Харин Японы сөрөг хүчний намыг тэргүүлж байсан Кэнжи Эда Засгийн газар болон мужийн захиргааны хооронд ийнхүү маргаан дэгдэж, асуудлыг шүүхээр шийдвэрлэхээс өөр аргагүйд хүрснийг эрс шүүмжилсэн байр суурьтай байна.

Тэрээр Шинзо Абэг яаралтай Окинава аралд айлчлан, мужийн захирагч Такеши Онагатай уулзаж, яриа хэлэлцээ хийх хэрэгтэй гэж үзэж байгаа юм. Энэ мэт санал шүүмжлэлийн хариуд Японы Ерөнхий сайд Футенма баазыг нүүлгэх ажлыг эхлүүлэхийн тулд чадах бүхнээ хийж, мужийн эрх баригчидтай нэгдсэн байр суурьт хүрэхээр ажиллах болно гэдгээ өчигдөр мэдэгдсэн байна.

Японы Засгийн газар АНУ-ын цэргийн баазыг Окинава мужийн олон оршин суугчтай Хэноко дүүргээс нүүлгэхээр шийдвэрлэсэн нь баазын зүгээс олон нийтийн эрүүл мэнд, аюулгүй байдалд учрах эрсдлийг бууруулах зорилготой гэж Шинзо Абэ тайлбарлаж байна.

Гэхдээ Окинава арлын иргэд баазыг мужийн дотор нүүлгэн шилжүүлэх бус, Окинава мужаас бүрэн гаргахыг шаардаж байна. Баазыг хүн ам багатай бүсэд нүүлгэн шилжүүлбэл тухайн бүс нутгийн экосистемд хор хөнөөл учруулах вий гэж Окинавагийн ард иргэд болгоомжилж байгаа юм.