Францын хойд хэсэгт орших Кале хотын дүрвэгчдийн хуарангийн өмнөд хэсгийг татан буулгах ажил эхэллээ. Өчигдөр дүрвэгчдийн хуаранд амьдардаг цагаач дүрвэгчид татан буулгах ажиллагааг эсэргүүцэн цагдаа нартай мөргөлдсөн байна. "Ройтерс" агентлагийн мэдээлснээр өчигдөр үд дунд гэхэд газар дээрх нөхцөл байдал хурцдаж, цагдаа нар үймээн өдөөсөн 150-200 цагаач дүрвэгчийн эсрэг нулимс асгаруулах хий ашиглахаас аргагүйд хүрчээ.

Мөн дүрвэгчдийн толгой хорогдож байсан гурван майханд гал гарсан байна. Одоогоор Кале хот дахь дүрвэгчдийн хуаранд 3000 мянга гаруй хүн орогнож байгаа юм. Тус хуарангийн зарим хэсгийг татан буулгахаар 20 орчим ажилтан цагдаа нарын өндөржүүлсэн хамгаалалтын дор ажиллаж байна.

Татан буулгах ажлыг зогсоохоор оролдсон нэг этгээдийг цагдаа нар баривчлаад байна. Кале дахь дүрвэгчдийн хуаранг ийнхүү татан буулгасан нөхцөлд тус хуаранд байгаа цагаач дүрвэгчид хаачих вэ гэдэг асуудал хөндөгдөж байгаа. Энэ тухайд Францын Дотоод хэргийн сайд Бернар Казнев хүмүүнлэгийн байгууллагуудтай хамтран ажиллаж, цагаач дүрвэгчдийг Францын бусад хэсэг дэх дүрвэгчид хүлээн авах төвүүдэд нүүлгэн шилжүүлэхээр ажиллана гэдгээ мэдэгдсэн юм.

Кале хот дахь дүрвэгчдийн хуарангийн өмнөд хэсэгт амьдарч байгаа цагаач дүрвэгчдийг албадан нүүлгэх тухай Францын Засгийн газраас гаргасан шийдвэрийг өнгөрсөн пүрэв гарагт шүүхээс дэмжсэн. Гэхдээ тус шийдвэрийн дагуу хуарангийн өмнөд хэсэг дэх сургууль, театр болон бусад үйлчилгээний газрыг нураалгүй үлдээхээр болж байна.

Афганистан, Сирийн дайн, хямралаас дүрвэн дайжсан иргэд өнгөрсөн онд Францын хойд нутгийн боомт хот Калед очсоор  тус хотод дүрвэгчдийн томоохон хуаран бий болсон юм. Энэ хуарангийн цагаач дүрвэгчид галт тэрэг болон ачааны авто машинуудад хулгайгаар суун, Их Британийн хилд нэвтрэхээр завдсан тохиолдол олон гарсан байна.