Өчигдөр Умард Атлантын гэрээний байгууллага НАТО Кувейт улстай транзит тээврийн салбарт хамтран ажиллах хэлэлцээр байгуулжээ. НАТО-гийн Ерөнхий нарийн бичгийн дарга Йенс Столтенберг Кувейтэд албан ёсны айлчлал хийх үеэрээ тус гэрээнд гарын үсэг зурсан байна. Талуудын байгуулсан энэ хэлэлцээрийн хүрээнд НАТО-гийн албан хаагчид болон цэргийн тоног төхөөрөмжийг Кувейтийн нутаг дэвсгэрээр дамжуулан тээвэрлэх боломж нээгдэж байгаа юм. 

НАТО-гийн Ерөнхий нарийн бичгийн дарга мөн Кувейт дэх айлчлалынхаа хүрээнд тус улсын эмир Шейх Сабах аль-Ахмед аль Жабер ас-Сабах болон Ерөнхий сайд Жабер аль-Мубарак аль-Хамад ас-Сабах нартай уулзсан байна.

Та бүхэнд сануулахад, Истанбулын хамтын ажиллагааны санаачилгын бүс нутаг хариуцсан төв байрыг Кувейтийн нийслэлд байгуулж байгаа. 2004 онд Истанбулд болсон дээд хэмжээний уулзалтаас гарсан тус хамтын ажиллагааны санаачилгад одоогоор Бахрейн, Кувейт, Катар, Арабын Нэгдсэн Эмират гэсэн 4 орон нэгдээд байгаа юм. Энэ санаачилгын хүрээнд НАТО Персийн булангийн орнуудтай стратегийн дүн шинжилгээ хийх, цэрэг батлан хамгаалахын болон бусад хэд хэдэн салбарт хамтын ажиллагаагаа улам бүр өргөжүүлнэ гэж найдаж байгаа талаараа цахим хуудсан дахь мэдэгдэлдээ илэрхийлсэн байна.