"Оскар"-ын шагнал гардуулах 88 дахь удаагийн ёслолын шилдэг гол дүрийн жүжигчний төрөлд жүжигчин Леонардо Ди Каприо өмнө нь дөрөв бүдэрсэн азгүйтлээ эцэслэж, өчигдөр анх удаагаа ялалт байгуулсан. Түүний нэрийг зарлах агшинд АНУ-ын Лос Анжелес хотын "Долби" театрт хуран цугласан алдартнууд төдийгүй дэлхий даяар "Оскар"-ын шагнал гардуулах ёслолыг шууд үзэж байсан олон сая үзэгч баярласан нь лавтай. Леогийн шагнал гардан авахдаа танхимд цугласан олонд хандан хэлсэн үг бусад шагнал гардагсдынхаас хол илүү үзэгчдийн анхаарлыг татсан. Иймээс түүнийг "Оскар"-ын индэр дээрээс юу гэж хэлснийг өнөөдрийн мэдээндээ онцлон хүргэж байна.

Дэлхийн кино ертөнцийн шилдгүүдийг цуглуулдаг гэдэг утгаараа "Оскар"-ын шагнал гардуулах ёслолын ач холбогдол, хамрах цар хүрээ асар их. Энэ наадмыг өнгөрсөн онд зөвхөн “Эй-Би-Си” телевизээр л гэхэд 36.6 сая хүн үзсэн тооцоо байгаа юм. Харин энэ олон үзэгчийн хоймор дахь цэнхэр дэлгэцээр Лео жирийн нэг баярын үг хуваалцсангүй.

Тэрээр шилдэг гол дүрийн шагнал гардсаныхаа дараа олон нийтэд, эдгээр сая сая үзэгчдэд эх дэлхийгээ хайрлах, уур амьсгалын өөрчлөлттэй тэмцэхийг уриалсан байна. Ди Каприог "Оскар"-ын шагналд анх нэр дэвшиж байснаас нь хойш 23 жилийн дараа шилдэг гол дүрийн шагнал хүртэх боломж олгосон “The Revenant” буюу “Амилсан чөтгөр” кино хүний эх байгальтай холбогдсон сэжим, харилцааны талаар байсныг тэрээр онцолсон. Үүнийхээ дараа Лео уур амьсгалын өөрчлөлт бол бидний нүдний өмнө болж байгаа бодит үзэгдэл гээд дэлхийн дулааралтай тэмцэхийн тулд эв эе нэгтгэн, хамтран зүтгэхийг уриалсан юм.

Мөн байгаль орчныг бохирдуулагч том компаниудтай тэмцэгчид, нутгийн уугуул иргэд, нийт хүн төрөлхтний дуу хоолой болж байгаа хүмүүст та бидний дэмжлэг хэрэгтэй байгааг дахин дахин сануулсан. Хойч үе, үр ач нарын маань амьдрах дэлхийгээ боломж байгаа дээр нь хайрлаж, гамная гэж тэрээр "Оскар"-ын шагнал гардуулах ёслол болсон Долби театрын тайзнаас дэлхий нийтэд хандан уриалж байна.

Шоу бизнесийн салбарын том наадам болох "Оскар"-т олон улсын өмнө тулгамдсан, хүн бүхэнд хамаатай уур амьсгалын өөрчлөлтийн асуудлыг зоригтойгоор хөндсөн Леонардо Ди Каприогийн энэ үг "Оскар"-ын индэр дээрээс хэлсэн шилдэг талархлын үгсийн дунд зүй ёсоор бичигдэх нь лавтай.