Шууд Chart

Сирид энх тайван тогтоох хэлэлцээний дараагийн үе шат түр хойшиллоо

2016-03-02 16:01:23

Сирид гал зогсоох түр хэлэлцээр үргэлжлэн хэрэгжиж байна. Энэхүү хэлэлцээрийг Сирийн Засгийн газар болон сөрөг хүчний босогчдын бүлэглэлүүдээр сайтар дагаж мөрдүүлэхийн тулд НҮБ энх тайван тогтоох яриа хэлэлцээний хоёрдугаар шатыг эхлүүлэх товоо хойшлуулахаар шийдвэрлэжээ.

Энэ талаар өчигдөр Сирийн асуудал хариуцсан тусгай төлөөлөгч Стаффан де Мистура олон нийтэд зарласан байна. Сирид гал зогсоох хэлэлцээрийн дор тус улсын нутаг дэвсгэрт зэвсэгт мөргөлдөөн эрс намжсан боловч зарим нэг тал хэлэлцээрийг зөрчин гал нээсэн талаар мэдээлэл ирсээр байна. Эдгээр зөрчлийг арилгаж, Сирид энх тайван тогтоох хэлэлцээг зохион байгуулах ложистикийн болон техникийн боломж бололцоог хангахын тулд хэлэлцээний товыг хойшлуулахаар шийдвэрлэсэн байна. Ингэснээр энхийн хэлэлцээ өмнө нь товлосон гуравдугаар сарын 7-ны өдрөөс хоёр хоногийн дараа буюу гуравдугаар сарын 9-нд зохион байгуулагдахаар боллоо.

Сирид гал зогсоох хэлэлцээр хэрэгжиж эхэлсэн нь тус улсад энх тайван тогтоох найдвар бий гэдгийг олон улсад харууллаа гэж Сирийн Ерөнхийлөгч Башар Асад мэдэгдсэн. Гэхдээ тэрээр сөрөг хүчний босогчдын зарим бүлэглэл гал зогсоох хэлэлцээрийг зөрчих тохиолдол гарч байгааг мөн хэлсэн юм. Гал зогсоох хэлэлцээрийг үйлчлэх нөхцөл боломжоор хангахын тулд сөрөг хүчнийхний эсрэг хариу дайралт хийгээгүй гэдгээ тэрээр мөн мэдэгдсэн байна. Харин сөрөг хүчний бүлэглэлүүд хэлэлцээрийг зөрчин, гал нээсэн хэрэгт Сирийн Засгийн газрын цэргүүдийг хариу буруутгаж байна.

Талуудын энэ маргааныг үл харгалзан, АНУ, ОХУ-ын хамтран санаачилсан Сирид гал зогсоох хэлэлцээр өнгөрсөн сард эхэлсэн ч тодорхой үр дүнгүй завсарласан Сирид энх тайван тогтоох яриа хэлэлцээг дахин эхлүүлэх таатай нөхцөлийг бүрдүүллээ гэж ажиглагчид үзэж байна. Харин энэ хооронд НҮБ Сирийн бүслэлтэд орсон хот, тосгодод хүмүүнлэгийн тусламж хүргэх ажлаа улам бүр эрчимжүүлж байна.

Нийтэлсэн: Э.Энхрэл

Сирид энх тайван тогтоох хэлэлцээний дараагийн үе шат түр хойшиллоо  
Үзсэн: 604 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй