Дэлхий дахин интернэтээр дамжуулан хурдацтай хөгжлийн эрин зуунд улам бүр интеграцчилагдаж байна. Харин энэ хөгжил дэвшилтэй хөл нийлүүлж чадаагүй хоцорсон хөгжиж байгаа зарим орны ядуу буурай ард иргэдэд зориулан хямд үнэ өртөгтэй утас, компьютер сүүлийн үед нэлээд үйлдвэрлэгдэх болжээ. Бид та бүхэнд өмнө нь Энэтхэгийн компани 4 америк доллараас бага үнээр ухаалаг гар утсаа санал болгож байгаа талаар мэдээлж байсан. Харин АНУ "Эндлесс Компьютерс" компанийн 79 америк долларын үнэтэй компьютерийн процессороо олон нийтэд танилцуулсан байна.

"Эндлесс Компьютерс"-ийн үйлдвэрлэсэн “Эндлесс Мини” нэртэй процессор 79 доллар буюу ойролцоогоор 160 мянган төгрөгийн үнэтэй. Энэ процессор 24 гигабайт санах ойтой, 1 гигабайт шуурхай санах ойтой юм байна. "Эндлесс Компьютерс" компани хөгжиж байгаа улс орнуудын иргэдийг боломжийн үнэтэй компьютерээр хангах зорилготойгоор АНУ-ын Сан Франциско хотноо 2012 онд үйл ажиллагаагаа эхэлжээ. Тус компанийн “Эндлесс Мини” процессорт заавал дэлгэц тусгайлан худалдаж авах шаардлагагүй, харин зурагтад холбон ашиглах боломжтой юм байна.

Энэ процессорт төрөл Википедиа болон бусад нэвтэрхий толь, боловсролын лекц, хоолны жор, эрүүл мэндийн мэдээлэл агуулсан 100 гаруй төрлийн аппликешнийг урьдчилан суулгасан байна. Эдгээр процессороо тус компани Мексик, Гватемал болон Латин Америкийн бусад оронд худалдаалахаар төлөвлөж байгаа юм. Мөн цаашид "Эндлесс Компьютерс" үйл ажиллагаагаа өргөжүүлэн, Ази, Ойрхи Дорнод, Африкийн улс орнуудад ойрын жилүүдэд бүтээгдэхүүнээ борлуулж эхлэхээр зорьж байна.