БНХАУ энэ оны намар дэлхийн тойрог замд сансрын судалгааны хоёр дахь лабораторио байрлуулахаар төлөвлөж  байна. Тус сансрын лаборатори “Тяньгун-2” буюу “Тэнгэрлэг ордон-2” нэртэй юм.

Сансрын лабораторид сансрын хоёр нисгэгч байрлан, 30 хоногийн хугацаатай сансарт шинжлэх ухааны туршилт судалгаа хийнэ. Өмнө нь хөөргөж байсан “Тяньгун-1” сансрын лабораторитой харьцуулахад хоёр дахь судалгааны лабораторид илүү олон төрлийн тоног төхөөрөмж суурилуулсан юм байна. Эдгээр тоног төхөөрөмжийн тусламжтайгаар хятадууд ирээдүйд сансрын бие даасан станц байгуулах туршилтаа явуулах төлөвлөгөөтэй байна. “Тяньгун-2”-т суурилуулсан механик гарны тусламжтайгаар сансрын лабораторийн гадна үүссэн гэмтлийг автоматаар засварлах боломжтой юм. “Тяньгун-2” сансрын лабораторид нийт 14 төрлийн туршилт хийх юм.

Эдгээр туршилтын үр дүнг хиймэл дагуулын технологийг хөгжүүлэхэд ашиглана гэж Хятадын сансрын технологи инженерчлэлийн төслийн эрдэмтэд хэлж байна. Хятад 2020 он гэхэд дэлхийн тойрог замд өөрсдийн гэсэн сансрын станц байгуулахыг зорьж ажиллаж байна. Энэ станц гол модуль болон үүнтэй холбогдсон хоёр лаборатори гэсэн бүтэцтэй, нийт 20 тонн жинтэй байх юм.

Хятад улс 2011 оны есдүгээр сард “Тяньгун-1” сансрын лабораторио дэлхийн тойрог замд байршуулсан юм байна. Тус сансрын лаборатори дөрвөн жил гаруйн турш үйл ажиллагаагаа хэвийн явуулж байгаа юм. Цаашид ч тус лабораторийг үргэлжлүүлэн ашиглахаар Хятадын эрх баригчид төлөвлөж байна.