Саяхан Монголд ирж гурван сар ажилласан, 20 гаруйхан настай уран бүтээлч Нессим Стивенсон Монголыг дүрс бичлэгт буулгасныг олон улсын аялал жуулчлалын "Тревел Ресурс" цахим хуудаст онцолсон юм. 

Монголд хийсэн кино зураг авалтын гайхам агшнуудын цаана үлдсэн эгэл даруухан ч гэлээ нүд салгамгүй Монголын тал нутаг, ард түмний тухай энгийн боловч сэтгэл татмаар өгүүлсэн гэж энэхүү баримтат бүтээлийг шинжээчид магтан сайшааж байна. Стивенсоны 5 минут үргэлжлэх Монголын тухай дүрс бичлэгт нүүдэлчдийн мал аж ахуй, өхөөрдөм хөөрхөн гөлөгнүүдээс гадна монголчуудын ахуй амьдрал, хэрэглэдэг хоол хүнс, хамгийн гол нь монгол хүнийг дэргэд нь байгаа мэт ойр дотноор харуулсан нь бичлэгийг үзэж сонирхсон хүнийг Монголын тал нутагт очиж, монгол хүнтэй уулзсан мэт сэтгэгдэл төрүүлж байгааг аяллын цахим хуудсууд онцолсон аж.

Энэ бүтээлийн эзэн Стивенсон аяллыг харуулсан бүх дүрс бичлэг гял цал байх албагүйг харуулсан гэдэг утгаараа шинжээчдийн зүгээс харамгүй магтаал сонсож байгаа юм. Бас үзэгчдийг орчноос нь тасалж, дүрс бичлэгт бүрэн утгаар уусан төвлөрөхөд нөлөөлдөг хамгийн гол хүчин зүйл нь түүний зураглаачийн ур чадвар болохыг "Тревел Ресурс" цахим хуудас мөн мэдээлж байна.