НҮБ-ын Аюулгүйн зөвлөл өнгөрсөн лхагва гарагт БНАСАУ-ын эсрэг нэмэлт хориг арга хэмжээ тогтоох тухай тогтоолын төслийг хэлэлцэж, санал нэгтэйгээр баталжээ. Умард Солонгосын нэгдүгээр сард хийсэн цөмийн туршилт болон өнгөрсөн сард хөөргөсөн баллистик пуужинтай холбогдуулан тогтоож байгаа энэ удаагийн нэмэлт хориг арга хэмжээ өмнөх хоригуудтай харьцуулахад өргөн хүрээг хамарсан, Умардын цөмийн болон пуужингийн хөтөлбөрийг санхүүжүүлэх хөрөнгийг шавхахад чиглэсэн хатуу чанга, шинжтэй байгааг ажиглагчид онцолж байна.

Тогтоолын төслийг АНУ, БНХАУ олон хоног үргэлжилсэн яриа хэлэлцээний эцэст боловсруулж, НҮБ-ын Аюулгүйн зөвлөлд өргөн барьсан юм. Энэ төслийг Аюулгүйн зөвлөлийн гишүүн орнууд санал нэг баталснаар Умардын эдийн засгийн нөхцөл байдал улам хүндрэх нь гарцаагүй боллоо. Шинэ хориг арга хэмжээний хүрээнд Умард Солонгос руу орж, гарч байгаа бүх ачаа тээвэрт нарийвчилсан шалгалт хийхээр болж байна. Энэ шалгалтын үр дүнд олон улсын хоригт багтсан бараа бүтээгдэхүүнийг хууль бусаар Умард Солонгос руу тээвэрлэхээс сэргийлэх юм.

Үүнээс гадна тус улсын хувь хүн, албан байгууллагын эсрэг хар жагсаалтад Умард Солонгосоос Сири, Иран, Вьетнамд суугаа худалдааны төлөөлөгчдийг оролцуулан нийт 16 хувь хүн, 12 аж ахуйн нэгжийг нэмжээ. Мөн Умард Солонгос руу 2 мянган америк доллараас дээш үнэтэй тансаг хэрэглээний бараа бүтээгдэхүүн экспортлохыг хориглосон байна. Мөн Умард Солонгосын хөлөг онгоцны фирмийн эзэмшил дэх 31 хөлөг онгоцыг хар жагсаалтад багтаажээ. НҮБ-ын Аюулгүйн зөвлөл нэмэлт хориг арга хэмжээний тогтоолыг баталсны дараа Умард Солонгос энэ тухай албан ёсоор байр сууриа илэрхийлээгүй байна.

Харин Европын холбоо НҮБ-ын тогтоосон шинэ хориг арга хэмжээг дэмжиж байгаагаа илэрхийлээд тус хоригт нийцүүлэн Европын холбооноос Умардын эсрэг тогтоосон хориг арга хэмжээний агуулгыг өнөөдөртөө багтаан шинэчлэхээр болжээ.