Японы Ерөнхий сайд Шинзо Абэ өөрийн бүрэн эрхийн хугацаа дуусах 2018 оны есдүгээр сараас урьтаж улсынхаа үндсэн хуульд нэмэлт өөрчлөлт оруулахыг зорьж байгаагаа мэдэгджээ. Пүрэв гарагт Японы парламентын дээд танхимын төсвийн хороо хуралдах үеэр тэрээр энэ тухай зарласан байна.

Түүний харьяалагддаг Либерал ардчилсан нам Үндсэн хуульд нэмэлт өөрчлөлт оруулах тухай хуулийн төслийг боловсруулжээ. Энэ хуулийн төсөлд Японы “Өөрийгөө хамгаалах үндэсний хүчин”-г байгуулах тухай тусгажээ. Харин эрх баригч нам тус төслөө батлуулахын тулд Японы парламентын хоёр танхимын аль алины хууль тогтоогчдын 66-гаас дээш хувийн дэмжлэгийг авах шаардлагатай юм. Иймээс Японы Ерөнхий сайд Шинзо Абэ бусад нам хүчин энэ саналд нааштай хандтал хуулийн төслийг өргөн барилгүй азнаж байна.

Тус улсын Батлан хамгаалахын сайд Кен Накатанигийн өгсөн тайлбараар Үндсэн хуульд нэмэлт өөрчлөлт оруулах хуулийн төсөлд Япон улс өөрийгөө хамгаалах төдийгүй холбоотон орнуудынхаа аюулгүй байдлын төлөө цэргийн ажиллагаа явуулах эрхийг нээхээр заасан байна. Энэ эрхийг НҮБ-ын Дүрэмд тусгасан байдгийг тэрээр мөн онцлон тэмдэглэжээ. Олон хүн амтай дэлхийн улс орнуудаас Япон дангаараа бие даасан цэрэг хүчингүй болохыг Кен Накатани мөн хэлж байна. Аливаа улс орон өөрийн тусгаар тогтнол, энх тайван байдлыг сахин хамгаалах, ард түмнийхээ аюулгүй байдлыг баталгаажуулахын тулд цэрэг хүчинтэй байхын чухлыг Японы эрх баригч нам онцолж байгаа юм.