НҮБ-ын Аюулгүйн зөвлөл БНАСАУ-ын эсрэг нэмэлт хориг арга хэмжээ хэрэгжүүлэх тухай тогтоолыг дуу нэгтэйгээр баталсан. Харин үүнээс хэдхэн цагийн дараа Умард Солонгос Япон тэнгис рүү ойрын тусгалтай хэд хэдэн пуужин харвасан байна. Өмнөд Солонгосын ерөнхийлөгч Пак Гын Хе Пхеньяны дарангуй засаглалыг эцэс болгохоо амлаж, дэлхийн олон орон Умардын эсрэг хориг арга хэмжээг сайшаан, дагаж мөрдөхөө илэрхийлээд байгаа. Энэ үеэр Умард пуужин харвасан нь Солонгосын хойгийн нөхцөл байдлыг улам бүр хурацатгалаа гэж ажиглагчид үзэж байна.

Умард Солонгос нэгдүгээр сард цөмийн туршилт хийн, өнгөрсөн сард алсын тусгалтай баллистик пуужин хөөргөсөнтэй холбогдуулан Өмнөд Солонгосын зэвсэгт хүчин түгшүүрийн зэрэглэлээ аль хэдийн нэмэгдүүлээд байгаа юм. Умардаас өчигдөр Япон тэнгис рүү харвасан пуужингууд ямар төрлийн пуужин болохыг тогтоохоор Өмнөд Солонгосын Батлан хамгаалах яам ажиллаж байна. НҮБ-ын Аюулгүйн зөвлөл Умардын эсрэг хориг тогтоох тухай тогтоолыг батлах үеэр ОХУ-аас НҮБ-д суугаа байнгын төлөөлөгч Виталий Чуркин Умард Солонгосын ойрын үед хэрэгжүүлсэн үйл ажиллагаа нь тус улс өмнөх удаагийн хориг арга хэмжээнээс сургамж аваагүйг харуулсан гэж мэдэгдсэн байна.

АНУ Умардыг нөхцөл байдлыг улам хурцатгах өдөөн хатгалга хийлгүй, олон улсын өмнө хүлээсэн үүрэг хариуцлагаа биелүүлэхийг уриалсан юм. Харин Хятадын гадаад хэргийн яамны хэвлэлийн төлөөлөгч бүх тал хурцадмал байдлыг дэвэргэхээс зайлсхийнэ гэж найдаж байгаагаа илэрхийлжээ. Умард Солонгосын худалдааны хамгийн түнш, мөн тус улстай хамгийн ойр харилцаатай улс гэгддэг Хятад Умардын эсрэг шинэ хориг арга хэмжээг бүрэн дэмжиж, хэрэгжүүлнэ гэдгээ мэдэгдээд байгаа юм.

Гэхдээ хориг арга хэмжээ Умардын жирийн ард түмний амьдралд сөрөг нөлөө үзүүлэхээс сэргийлэхэд олон улс хүчин зүтгэл гаргах ёстой гэж Хятадын тал үзэж байна. Цаашид хатуу хориг арга хэмжээнээс үүдэн Умард Солонгосын засгийн газар зэвсэглэлээр улам эрчимтэй хөөцөлдөх вий гэж Бээжин болгоомжилж байгаа юм.