Дэлхийн нэгдүгээр дайны үед Францын Сомм голын эрэгт Германы эсрэг Их Британи, Францын армиуд хамтран түүхэн тулалдааныг хийсэн байдаг. 1916 оны долоодугаар сараас арваннэгдүгээр сарын хооронд өрнөсөн энэ тулалдааны 100 жилийн ойг тохиолдуулан Францын ерөнхийлөгч Франсуа Олланд, Их Британийн ерөнхий сайд Дэвид Кэмерон нар уулзсан байна. Өчигдөр болсон энэ уулзалтаар хоёр орон цэрэг батлан хамгаалахын салбарт ашиглах нисгэгчгүй төхөөрөмж дроны шинэ хувилбарыг зохион бүтээх хоёр тэрбум еврогийн төсөл хэрэгжүүлэхээр тохиролцжээ.

Энэ тохиролцооны хүрээнд Франц, Их Британийн компаниуд хамтран олон зориулалтаар ашиглаж болох Европ дахь хамгийн дэвшилтэт загварын нисгэгчгүй төхөөрөмж бүтээн, 2020 он гэхэд техникийн шалгалтад оруулах, 2030 он гэхэд хэрэглээнд нэвтрүүлэхээр төлөвлөж байна. Төслийн үр дүнд хоёр оронд олон тооны ажлын байр шинээр бий болно гэдгийг Камерон, Олланд нар онцолж байгаа юм. Үүнээс гадна өнөөдөр Парис хотноо Их Британи, Франц, ОХУ, Герман зэрэг орон багтдаг Нормандын дөрвөлийн дээд хэмжээний уулзалт зохион байгуулагдана.

Тус уулзалтыг угтан Их Британи, Францын удирдагчид Сирийн асуудлаар хэлэлцэж, байр сууриа нэгтгэсэн байна. АНУ-ын тэргүүлсэн эвсэлд багтдаг тус хоёр орон Сирид "Исламын улс" бүлэглэлийн эсрэг агаарын цэргийн ажиллагаа явуулж байгаа. Өнгөрсөн бямба гарагаас Сирийн нутаг дэвсгэрт үйлчилж эхэлсэн гал зогсоох хэлэлцээрийг үл харгалзан Сирийн ерөнхийлөгч Башар Асад болон ОХУ-ын агаарын цэргийн хүчнийг Сирид аядуу үзэлт сөрөг хүчний босогчдын байршилд цохилт өгсөн хэвээр байна гэж Их Британи, Францын тал үзэж байна. Иймээс тэд өнөөдөр болох дээд хэмжээний уулзалтаар сөрөг хүчний эсрэг цохилт хийхгүй байх талаар ОХУ-д хамтран шахалт үзүүлэхээр болжээ.