Дэлхийн хамгийн урт их бие бүхий нисдэг хөлөг анхны нислэгээ үйлдэхэд хэдхэн долоо хоног үлджээ. Энэ тухай “Скай Ньюс" мэдээллийн агентлаг уламжиллаа. Тус агентлагийн мэдээлснээр “Эйрлендер 10” нэртэй энэхүү аварга том хөлгийг АНУ-ын армийн хэрэгцээнд зориулан зохион бүтээсэн байна. Гэхдээ тус төсөл зогссоны дараа энэхүү нисэх онгоцыг арилжааны нислэгт зориулан шинэчлэн загварчлаад байгаа нь энэ юм.

Ирэх сард “Эйрлендер 10” Их Британийн зүүн нутагт оршдог Бедфордшир гүнлэгийн Кардингтон тосгоноос эхний нислэгтээ хөөрөх юм байна. “Эйрлендер 10”-ыг агаарын хөлөг болон нисдэг онгоцны хослуулсан загвараар зохион бүтээсэн байна. Энэ нисэх онгоцны их бие 92 метр урттай нь одоо ашиглагдаж байгаа хамгийн урт их биетэй нисэх онгоцныхоос даруй 18 метр илүү урт гэсэн үг. Энэ үзүүлэлтээрээ тус нисэх онгоц дэлхийн хамгийн урт, мөн хамгийн том нисэх онгоцоор зүй ёсоор тодроод байна. “Эйрлендер 10” дөрвөн хөдөлгүүртэй.

Мөн 6,100 метрийн өндөрт хөөрч, цагт 148 км хурдлах хүчин чадалтай юм байна. “Хайбрид Эйр Вехиклс” компани цаашид дахин 10 ширхэг “Эйрлендер” нисэх онгоц бүтээхийг зорьж ажиллаж байна. Нисэх онгоцноос ялгаатай нь “Эйрлендер 10” заавал тусгай нисэх зурвас гэлтгүй ямар ч төрлийн гадарга, тэр дундаа усан дээр саадгүй газардах боломжтой юм байна. Учир нь энэ хөлгийг агаараас хөнгөн хий болох гелигээр дүүргэсэн байгаа юм. “Эйрлендер 10” 48 зорчигч суулгах, 10 тонн ачаа тээвэрлэн цагт 148 км хурдтайгаар 5 хоног зогсолтгүй нислэг үйлдэх хүчин чадалтай юм байна. Энэ шинж чанараараа тус агаарын хөлөг хүрч очиход хүндрэл бэрхшээлтэй бүс нутагт ачаа бараа тээвэрлэхэд хамгийн тохиромжтой гэж үйлдвэрлэгчид нь онцолж байна.