Иран улс өчигдөр хэд хэдэн тооны баллистик пуужин туршсан тухай тус улсын төрийн мэдлийн телевиз мэдээлсэн байна. Энэхүү пуужингийн туршилт НҮБ-ын холбогдох тогтоолуудыг зөрчсөн учраас цаашид АНУ-аас Ираны эсрэг хариу арга хэмжээ хэрэгжүүлж магадгүй гэж олон улсын ажиглагчид үзэж байна. Өнгөрсөн оны 10 дугаар сард Иран дунд зайн тусгалтай Эмад пуужин туршсаны хариуд 2 сарын өмнө АНУ-ын зүгээс Ираны пуужингийн хөтөлбөртэй холбоотой хувь хүн, аж ахуйн нэгжийн эсрэг хориг арга хэмжээ тогтоосон юм.

Харин энэ удаад Ираны төрийн мэдлийн телевизийн өгсөн мэдээлэл үндэстэй эсэх нь тогтоогдвол НҮБ-ын Аюулгүйн зөвлөлд тус асуудлыг оруулж, зохих хариу арга хэмжээ авахыг шаардах болно гэдгийг АНУ-ын төрийн департаментын хэвлэлийн төлөөлөгч мэдэгджээ. Үүний зэрэгцээ АНУ дангаараа Ираны эсрэг нэмэлт хориг арга хэмжээ тогтоох боломжийг ч тэрээр үгүйсгээгүй байна. Өчигдөр Ираны төрийн төв телевиз баллистик пуужин харваж байгаа дүрс бичлэгийг дамжуулсан юм. Тус телевизийн өгч байгаа мэдээллээр сая харвасан пуужин нь дунд зайн тусгалтай “Киам-1” пуужин байсан байна. Туршилтыг орон нутгийн цагаар өчигдөр өглөө явуулжээ. Ираны зэвсэгт хүчин дунд тусгалын пуужин нь 700 км-ын алс дахь байг амжилттай сөнөөсөн гэж мэдэгдээд байна.

АНУ, Францын тал энэ туршилт НҮБ-ын Аюулгүйн зөвлөлийн 2231 дугаар тогтоолыг зөрчсөн болохыг анхааруулж байгаа. Тус тогтоолд Иран улс цөмийн цэнэгт хошуу тээвэрлэх хүчин чадалтай бүх төрлийн баллистик пуужинтай холбогдсон ямарваа үйл ажиллагаа эрхлэхгүй байхад уриалсан байдаг. Гэхдээ Ираны пуужингийн туршилт өнгөрсөн оны долоодугаар сард дэлхийн таван их гүрэн Ирантай байгуулсан цөмийн асуудлаарх гэрээг зөрчсөн гэх үндэслэл болохгүйг Вашингтон мэдэгдэж байна. Энэ гэрээгээр Иран цөмийн хөтөлбөрийн цар хүрээгээ хумьсны хариуд олон улс эдийн засгийн хориг арга хэмжээгээ зөөллөхөөр тохиролцсон юм.