Сирид энх тайван тогтоох яриа хэлэлцээний 2 дугаар үе шат өнөөдөр эхлэх гэж байна. Харин тус яриа хэлэлцээнд оролцогч талууд Сирийн Ерөнхийлөгч Башар Асадыг засгийн эрхээс буулгах эсэх тухайд харилцан буулт хийх шинжгүй байгаа нь энэ удаагийн яриа хэлэлцээ дахин амжилтгүй өндөрлөх вий гэсэн болгоомжлолыг олон улсад төрүүлж эхэллээ.

Тав дахь жилдээ үргэлжилж байгаа Сирийн хямралыг эцэслэхийн тулд АНУ, ОХУ хамтран ажиллаж, улмаар Сирид гал зогсоох хэлэлцээрийг хэрэгжүүлж эхэлсэн. Тус хоёр улсын дэмжлэг дор НҮБ энэ удаагийн яриа хэлэлцээг зохион байгуулж байгаа юм. Гэхдээ энэ удаагийн яриа хэлэлцээнд Сирийн Засгийн газар болон сөрөг хүчний босогчид харилцан буулт хийхгүй нөхцөлд Сирид мөргөлдөөн хямрал дахин гаарч болзошгүйг ОХУ-ын Гадаад хэргийн яам анхааруулсан байна. Өнгөрсөн бямба гарагт Сирийн сөрөг хүчний босогчид тус улсын Засгийн газрын байлдааны онгоцыг чиглүүлэн пуужин харвасан нь үүний нотолгоо гэж Оросын Гадаад хэргийн яам тайлбарлаж байна.

Үүнээс гадна Сирийн Гадаад хэргийн сайд сөрөг хүчний босогчдод хандан Ерөнхийлөгч Башар Асадыг огцруулах тухай асуудлыг энхийн хэлэлцээний үеэр хөндөх бодолгүй гэдгээ мэдэгдсэн байна. Сирийн сөрөг хүчний томоохон бүлгүүд Женевийн яриа хэлэлцээнд оролцоно гэдгээ мэдэгдсэн ч, энэ хэлэлцээнээс төдийлөн дорвитой үр дүн гарна гэж найдахгүй байгаа юм. Өнгөрсөн 9 дүгээр сарын сүүлээс ОХУ Сирид агаарын цэргийн ажиллагаа эхлүүлсний дараа Башар Асадын цэргүүд давшилтаа эрчимжүүлж, босогчдод алдсан газар нутгаа эргүүлэн чөлөөлж эхэлсэн. Гэхдээ яриа хэлэлцээний энэ үе шатнаас шийдтэй үр дүн гарахгүй бол дахин яриа хэлэлцээнд оролцолгүй цэргийн ажиллагаагаа дахин үргэлжлүүлнэ гэдгээ Сирийн сөрөг хүчний бүлэглэлүүд мэдэгдсэн байна.