Шууд Chart

Өнөөдөр Сирид парламентын сонгууль болно

2016-04-13 12:51:00

Сирийн Засгийн газрын хяналтад байгаа бүс нутгуудад өнөөдөр парламентын сонгууль зохион байгуулагдах гэж байна. Энэ сонгуулийг Сирийн Ерөнхийлөгч Башар Асадын намд л ашигтай үйл явдал гэж зарим улс орон, мөн Сирийн сөрөг хүчний босогчид шүүмжилж байгаа юм. "Ассошиэйтед Пресс" агентлагийн мэдээлснээр энэ удаагийн сонгуульд оролцож байгаа 12 мянган нэр дэвшигч бүгд Башар Асадын талыг баримтлагчид юм байна.

Үүнээс гадна Сирийн босогчид болон "Исламын улс" бүлэглэлийн хяналтад байгаа бүс нутгуудад сонгуулийн санал хураалт явагдахгүй юм. Сирийн нийслэл Дамаск хотын иргэд сонгууль зохион байгуулахыг дэмжиж байгаагаа илэрхийлж байна. Тэд өөрсдийгөө төлөөлөх улс төрчдийг Сирийн иргэд гадаад улс орнуудын оролцоогүйгээр бие даан сонгох нь зүйтэй гэж үзэж байгаа юм. Үүнээс гадна өнөөдөр болох парламентын сонгууль албан бус шинжтэй учраас санал өгөх хүсэлгүй иргэд заавал оролцох шаардлагагүй юм байна.

Гэхдээ өөрсдийгөө төлөөлөх улстөрчдийг сонгох сонгуулийн санал хураалтад оролцох нь иргэн бүрийн үүрэг гэж үзэж байгаагаа Дамаск хотын иргэд илэрхийлж байна. Үүнтэй зэрэгцэн өнгөрсөн сард завсарласан Сирид энх тайван тогтоох хэлэлцээ өнөөдрөөс Швейцарийн Женев хотноо үргэлжлэх гэж байна.

Сирийн Засгийн газар ямар нэг урьдчилсан нөхцөл тавилгүйгээр энэ удаагийн яриа хэлэлцээнд оролцоно гэдгийг тус улсын Гадаад хэргийн сайд мэдэгдээд байгаа юм. Яриа хэлэлцээний энэ үе шатанд Сирийн Засгийн газар болон сөрөг хүчний босогчдын төлөөлөл шинэ үндсэн хууль боловсруулах талаар голлон хэлэлцэх юм байна.

Нийтэлсэн: Э.Энхрэл

Өнөөдөр Сирид парламентын сонгууль болно   
Үзсэн: 553 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй