Сохорч болзошгүй байсан өвчтөнүүдийн хараа генийн эмчилгээний тусламжтай сайжирч, анагаах ухааны салбарт бас нэгэн дэвшил авчирсан талаар мэдээ ирж байна. Их Британийн эрдэмтдийн хийсэн клиник судалгааны дүнд генийн эмчилгээгээр сайжирсан хараа эргэн муудахгүй тогтох боломжтой гэж дүгнэжээ.

Ингэснээр удамшлын шалтгаанаар сохорч болзошгүй өвчтөнүүдийн харааг генийн эмчилгээний тусламжтай сэргээх боломж нээгдлээ гэж шинжээчид онцолж байна. Ирэх жилээс янз бүрийн генийн эмгэгээс үүдэлтэй сохролтыг генийн эмчилгээний тусламжтай эмчлэх туршилтаа эрдэмтэд эхлүүлэхээр төлөвлөж байна. Сохролтын эсрэг генийн эмчилгээ гэдгийг мэргэжилтнүүд дараах байдлаар тайлбарлаж байгаа юм.

Генийн эмгэгээс үүдэн сохрох гэж байгаа хүнд тухайн генийн ажиллагаатай хувилбарыг нүдний угт тарьснаар энэ гень эсийн нөхөн төлжилт явагдахад туслалцаа үзүүлдэг байна. Дээрх аргаар хараа сэргээх эмчилгээг Их Британийн 14, АНУ, Канад, Герман зэрэг бусад орны 18 өвчтөн дээр өнгөрсөн 4 жил 6 сарын хугацаанд туршжээ.

Туршилтын үр дүнд Оксфордын их сургуулийн судалгааны баг ХОРОИ-ДЕРЕМИЯ гэх ховор эмгэгийг эмчлэх боломжтой болсон байна. Энэ эмгэгтэй хүн алдаатай гень өвлөн авснаасаа үүдэн нүдний торлог бүрхэвчийнх нь эсүүд аажмаар үхэж, сохордог юм.

Харин генийн эмчилгээгээр ийм эмгэгтэй хүмүүсийг сохрохоос сэргийлээд зогсохгүй үхэж байгаа зарим эсийг нь нөхөн төлжүүлж, хараа сайжирч байгааг тогтоосон байна.